Sýretti túsirgen – Erlan OMAR, «EQ»
Sátbaev qalasyndaǵy №25 mekteptiń ashylǵanyna kelesi jyly 60 jyl tolady. Osy ýaqyt ishinde munda tek orys tili ústemdik quryp kelgen edi. Al bıyl alǵash ret úsh qazaq synyby jáne mektepke daıarlyq tobyna bir qazaq synyby ashyldy.
– Árıne, ońaıǵa túsken joq. Ata-analardy ılandyrýǵa týra keldi. Sózimizge ılikpegenderi de kezdesti. Eń bastysy, seń qozǵaldy. Endi mektebimiz qazaqylana bastaıtyny kúmánsiz. Aldaǵy ýaqytta bul synyptarǵa qosa qazaq tilinde bilim alatyn 5-synypty da ashý oıda bar. Qazir sol baǵytta jumys istep jatyrmyz, – dedi mektep dırektory Jansaıa Bodyqova.
Bilim kúninde alǵash ret partaǵa otyrǵan 1 «á» synybynyń oqýshylarymen birge olardyń synybyna bardyq. Bul synyptyń jetekshisi Kúláıhan Elibaeva – qaladaǵy maqtaýly muǵalimderdiń biri. Jıyrma jylǵa jýyq tájirıbesi bar. Alpys jyl degende bul mekteptiń tabaldyryǵyn alǵash ret qazaq synybynyń qarlyǵashtary bolyp attaǵan balalardyń ata-analaryn da tilge tarttyq.
– Ekinshi nemerem Farıda osynda oqıtyn boldy. Úıimizdiń qasyndaǵy mektepten qazaq synyby ashylǵanyna qýanyshtymyn, qatarymyzdyń qalyńdaı túskenin qalaımyn, – dedi eńbek ardageri Ábdirahman Túsipbekov.
Tuńǵyshy Mansurdy mektepke jetektep ákelgen Aıdana Sákebaeva: «Úsh jyl buryn Qaraǵandy qalasynan kóship kelgen edik. Bıyl minekı, buryn-sońdy bolmaǵan oqıǵanyń kýási bolyp turmyz. Orys mektebinen bir emes, birneshe qazaq synyby ashyldy. Sóıtip, qadamymyz qutty bolyp jatyr», dedi.
Ulytaý oblysy
