Máýlen Áshimbaev Joldaýda berilgen tapsyrmalar qazirgi jaǵdaıda ózekti ekenin atap ótti. Sondaı-aq ol Memleket basshysy usynǵan reformalardy iske asyrý jolynda azamattardyń judyryqtaı jumylýy mańyzdy ekenine nazar aýdardy.
«Memleket basshysy Joldaýda elimizdegi ekonomıkalyq saıasattyń jańa modelin qalyptastyrýǵa basymdyq berdi. Qazirgi tańda álemdegi kúrdeli ahýal memleketterdiń damýyna óz áserin tıgizýde. Osyndaı qıyn kezeńde Prezıdentimiz halyqtyń turmys sapasyn arttyrýǵa úlken kóńil bólip otyr. Joldaýda shaǵyn jáne orta kásipkerlikti qoldaýdyń júıeli mehanızmderi kórsetildi. Bárine birdeı túsinikti, ashyq, ádiletti salyq saıasatyn qamtamasyz etý qajettigi aıtyldy. Investısııa tartýǵa qolaıly bıznes klımat qalyptastyrýǵa basa mán berildi. Sondaı-aq Prezıdentimiz elimizdi ındýstrııalandyrý kezeńderinde qordalanǵan problemalardy sheship, bul úderisti sapaly júrgizýdi tapsyrdy. Aýqymdy ınfraqurylymdyq serpilis jasaý arqyly óńirlerdiń de damýyna jańa tynys berý kózdelip otyr. Munyń bári halyqtyń ómir súrý sapasyn arttyryp, ádilettilik qaǵıdatynyń barlyq salada júzege asýyna múmkindik beretini sózsiz. Aldaǵy ýaqytta Senat Prezıdentimiz belgilep bergen mindetterdi zańnamalyq turǵydan sapaly ári ýaqtyly qamtamasyz etý jolynda belsendi jumysyn jalǵastyra beredi», dedi Máýlen Áshimbaev.
Sonymen qatar Palata spıkeri senatorlardyń óńirlerge saparlaryn qorytyndylap, barlyq deńgeıdegi depýtattarmen jáne jurtshylyqpen júıeli ózara baılanys ornatýdyń mańyzdylyǵyna toqtaldy.
Máýlen Áshimbaev jaz aılarynda senatorlar óńirlerde jergilikti halyqpen, qoǵam ókilderimen jáne máslıhat depýtattarymen 580-nen astam kezdesý ótkizgenin atap ótti. Atalǵan kezdesýlerde aıtylǵan usynystar, múddeli taraptardyń, túrli áleýmettik toptardyń, sarapshylardyń, qoǵamdyq ınstıtýttardyń jáne ǵalymdardyń pikirleri zań shyǵarý qyzmetinde nazardan tys qalmaý kerektigi de atap ótildi.
Sondaı-aq palata otyrysynda depýtattar Elektrondyq júıeniń paıdalanylýyn jáne oǵan qyzmet kórsetetin personaldyń jumysyn baqylaý jónindegi komıssııany qurý týraly máseleni qarady.
