Foto:gov.kz
Is-shara akt zalynda ótkizilip, onda Qazaqstan Respýblıkasynyń Prezıdenti Qasym-Jomart Toqaevtyń úndeýi úlken ekranda kórsetildi.
El Qarýly Kúshteriniń Joǵarǵy Bas qolbasshysy memlekettiń ulttyq qaýipsizdigin qamtamasyz etý úshin qorǵanys-ónerkásip keshenin jan-jaqty nyǵaıtý qajettigin jetkizdi.
Onyń pikirinshe, qarý-jaraq pen áskerı tehnıkanyń ımporttyq jetkizilimderine táýeldilikti azaıtý úshin lokalızasııanyń joǵary úlesi bar óndiris sıklin qurý mańyzdy mindet bolyp otyr.
Tehnıkany shuǵyl jóndeıtin óndiris oryndarynyń qýatyn arttyryp, otandyq kásiporyndarǵa barynsha qoldaý kórsetken jón. Bizde oǵan qajetti materıaldyq-tehnıkalyq baza, bilik pen tájirıbe jáne mamandar bar. Tek olarǵa quzyrly mekemelerdiń tapsyrysy kerek.
Zamanaýı tehnologııa transfertin jasaý jáne jańa óndirister ashý jumysyn jalǵastyrǵan jón.
Arnaýly qorǵanys-ónerkásip keshenin damytý qory arqyly óz kásiporyndarymyzǵa tikeleı qarjylyq qoldaý kórsetiledi, dep atap ótti Prezıdent.
Joldaý boıynsha Ulttyq ulan Bas qolbasshysynyń tárbıe jáne áleýmettik-quqyqtyq jumys jónindegi orynbasary Halyq qaharmany general-maıor Qaırat Úmbetov jalpylama túsinik berdi.
Memleket basshysynyń Joldaýynda kórsetilgen el damýynyń negizgi baǵyttaryn baıandaı otyryp, general-maıor Qaırat Úmbetov Memleket basshysynyń júrgizip jatqan saıasatynyń mańyzdylyǵyn atap ótti.
«Prezıdenttiń Joldaýy ádil Qazaqstandy qurýǵa baǵyttalǵan. Alaıda, bul úshin tek saıası jáne ekonomıkalyq reformalar jetkiliksiz. Eń aldymen, azamattardyń qoǵamdyq sanasy men umtylysyn ózgertý qajet», dep túıindedi sózin quqyqtyq tártip áskerleriniń bas tárbıeshisi Qaırat Úmbetov.
Elimizde konstıtýsııalyq jáne qoǵamdyq tártip ústemdik qurǵan. Onyń saqtalýy men qazaqstandyqtardyń beıbit ǵumyr keshýine ulandyq jaýyngerler tikeleı atsalysady.
