Bıylǵy Joldaýda da: «Biz agroónerkásip kesheninde naqty serpilis jasaýymyz kerek. Aýyl sharýashylyǵy salasynyń áleýeti orasan zor. Biraq qolda bar múmkindikterdi áli de tolyq paıdalanbaı otyrmyz. Qazaqstannyń aınalasynda ónim ótkizetin óte úlken naryqtar bar. Onda sapaly azyq-túlik ónimderi tapshy. Elimizdiń strategııalyq maqsaty – Eýrazııa qurlyǵyndaǵy basty agrarlyq ortalyqtyń birine aınalý», dep aıryqsha atap ótildi.
Memleket basshysy aıtqandaı, ol maqsatqa jetý úshin aldymen óndirilgen ónimderdi óz kúshimizben, joǵary talaptarǵa saı óńdeýge jedel kóshýimiz kerek. Bizdiń aýyl sharýashylyǵy ónimderi – dándi, maıly daqyldardyń basym bóligi shıkizat kúıinde shetelderge jóneltiletini belgili. Endigi jerde bul jeńil tájirıbeni meılinshe qysqartý kerek. О́ńdeý kásiporyndary sanyn barynsha kóbeıtip, salanyń jumysyn durys jolǵa qoıa bilsek qana óńdelgen ónim úlesin arttyrý múmkin bolady.
Bıylǵy jyl aýa raıy turǵysynan ońaı bolǵan joq. Jaýyn-shashyn mólsheriniń az bolýy, sý tapshylyǵy aýyl sharýashylyǵy men agroóndiristiń qalypty damýyna birshama zııan keltirdi. Sondyqtan Joldaýda aýyl sharýashylyǵy men aýmaqtyq damý baǵytyna barynsha basymdyq berilgenin biz, aýyl sharýashylyǵy ónimderin óndirýshiler qýana qabyldadyq.
Agrarlyq máseleler tyńǵylyqty tapsyrmalar tizimin quraıdy. Olarǵa shaǵyn sharýashylyqtardy qoldaý, jeke sharýashylyq ıeleriniń ózara birigýi, materıaldyq-tehnıkalyq bazany jańartý, ınnovasııalyq amal-tásilderdi óndiriske batyl engizý syndy agroónerkásip keshenin damytýǵa negiz bolatyn, serpin beretin qyzmetter kiredi. Sondaı-aq keıingi kezeńde qaýyrt qolǵa alynyp jatqan egistikti ártaraptandyrýdyń da mańyzy erekshe. Qazirde dıqandar burynǵydaı dástúrli daqyldardy ǵana ekpeı, dándi, maıly daqyldardyń birneshe túrin egýdi myqtap qolǵa alýda. Bul da bolsa – naryq zańy.
Saıyp kelgende, agroónerkásipke qatysty egistikti ártaraptandyrý, tıimdi shaǵyn jáne orta bıznesti damytý, óndiriske ozyq tehnologııalardy engizý máseleleri Joldaýda erekshe atap ótilgen «Aýyl amanaty» baǵdarlamasynyń halyqqa asa qajettigin, ómirsheńdigin bildiredi. Aýyl turǵyndaryn, sharýa baqqan eldi memleket tarapynan qoldaý sharalary san salaly. Sondyqtan atalǵan baǵdarlamany oryndaý, abyroımen atqarý – óz qolymyzda, bizdiń mindetimiz.
Edige TО́LEÝHANULY,
sharýa qojalyǵynyń
jetekshisi
