Bul aýylǵa mektep kerek-aq edi. Sebebi Astanaǵa jaqyn ornalasqan atalǵan eldi mekende halyq sany jyl saıyn kóbeıip keledi. Aýyldaǵy eki mektep jetkiliksiz boldy. Jańa oqý jyly qarsańynda 300 orynǵa arnalǵan bilim ordasynyń tabaldyryǵyn 435 oqýshy attap otyr. Mektep endi eki aýysymmen jumys isteıtin bolady. Kelesi jyly «Jaıly mektep» baǵdarlamasy aıasynda aýylda taǵy da 1 200 oryndyq mekteptiń qurylysy bastalady dep josparlanǵan.
Jańa mektepte 20 oqý kabıneti, akt, sportzaldary, fızıka jáne hımııa pánderine arnalǵan arnaıy kabınetter, lıngofondy, kompıýterlik synyptar, oqý zaly qamtylǵan kitaphanasy bar. Qazaq jáne orys tilderinde bilim beretin eki qabatty nysannyń qurylysyna memleketten 1,7 mlrd teńgeden asa qarjy jumsaldy. Bilim oshaǵy dırektorynyń mindetin atqarýshy Gúlnár Áýbákirova mekteptiń ashylý saltanatynda jas urpaqtyń sapaly bilim men sanaly tárbıe alýlaryna jasalǵan qoldaýǵa alǵysyn bildirdi. Lıseıde 50-den astam muǵalim eńbek etpek.
Aqmola oblysy
