Kitaptyń kólemi 22,5h16,5 sm, al bet sany 861 paraqtan turady. Týyndynyń ón boıynda 206 túrli polıtıp-foto, 20-dan asa dıagramma men kartogramma, sondaı-aq ólkeniń bir dana tutas kartasy jáne gýbernııaǵa qarasty ákimshilik aýmaqtardy kórsetken 8 shaǵyn karta engizilgen. Kitapta 1867 jyly irgesi qalanǵan Túrkistan gýbernııasynyń tarıhy baıandalady.
Kitapta osy jyldary ólkede 1,5 mln qazaq ómir súrgeni týraly málimetter, olardyń turmys-tirshiligi jaıynda kóptegen fotosýret jarııalanypty. Sonyń biri – kitaptyń 523-betindegi «Ańshylyq» atty VI bólimde jarııalanǵan foto. Qumnyń ishindegi jupynylaý jalǵyz úı. Ony búrkeı shoǵyrlanǵan aýyldyń qatyn-qalashy, túgeldeı dańǵara kımeshek kıip alǵan. Bulardyń qasynda túıege minip, sol qolyna buıda ustap, oń qolyndaǵy baldaqqa búrkit qondyrǵan qusbegi tur. Fotonyń astyna «Kırgız-ohotnık s berkýtom» degen anyqtama berilipti. Al fotony túsirgen «V.Iý. fon-Branke» degen adam eken.
Atalǵan foto-jádiger jarııalanǵan kitaptyń jaryq kórgenine bıyl 110 jyl tolyp otyr. Kitaptaǵy sýret qaıda túsirilgeni aıtylmaǵan. Biraq Syrdarııa óńirindegi qazaqtardyń ańshylyq kásibi týraly baıandalǵan, sondaı-aq qusbegi qazaqtar aýzynan jazyp alynǵan búrkittiń jasy men ataýyna qatysty eki túrli nusqa berilgen eken. Birinshi nusqa: bir jas – balapan, eki jas – tirnek, úsh jas – tastúlek, tórt jas – ana, bes jas – qana, alty jas – jańa, jeti jas – qum túlek, segiz jas – sum túlek, toǵyz jas – qońyr túlek, on jas – kári túlek, on bir jas – aq túlek, on eki jas – aqyrǵy túlek delinse, ekinshi nusqa boıynsha: bir jas – balapan, eki jas – han túbit, úsh jas – tirnek, tórt jas – tastúlek, bes jas – muzbalaq, alty jas – kók túbit, jeti jas – qana, segiz jas – jańa, toǵyz jas – maı túbit, on jas – barqyn, on bir jas – barshyn, on eki jas – shógil delingen.
