«О́simdik shıkizaty negizinde sıyr sútiniń almastyrǵyshtary óndirisin qurý» jobasyn Ǵylym qory arqyly óndiriske engizý jáne kommersııalandyrý qolǵa alyndy. Kommersııalandyrý jobasy aıasynda ósimdik shıkizatynan sút almastyrǵyshtardy shyǵaratyn qural-jabdyq satyp alý, jańa óndiristi uıymdastyrý, ázirlengen tehnologııalardy óndiriske engizý jumystary júzege asyrylyp jatyr.
– Jańa ónimderdiń naryqtaǵy artyqshylyǵy kóp. Aıtalyq, ımporttyq ónimderdi almastyrady. Sondaı-aq bıotehnologııalyq ádisterdi qoldana otyryp joǵary sapaǵa qol jetkizýge, qosymsha mıkroelementtermen baıytýǵa múmkindik beredi. Daıyn ónimniń quramyn jáne suranysqa baılanysty nysanaly maqsatyn retteý múmkindigi paıda bolady. Allergııamen aýyratyndar men ortalyq júıke júıesiniń syrqaty bar adamdar úshin qaýipsiz, konservanttary joq, dárýmendermen baıytylǵan ónim alynady. Onyń ústine qazir ýnıversıtet elimizdegi jalǵyz óndirýshi sanalady. Aldyn ala esepteýler boıynsha jańa ónimniń ózindik quny naryqtaǵy ımporttyq analogterden eki-úsh ese tómen. Sonymen qatar ónimniń eksporttyq áleýeti bar: 100 tonna ónim jetkizý úshin Qytaıdaǵy «Shaanxi Xingkailong Trading Co» JShS-men aldyn ala kelisim jasaldy, – deıdi bıologııa ǵylymdarynyń kandıdaty, joba jetekshisi Gúlnazym Ospanqulova.
Ǵalymnyń aıtýynsha, qazir sút ónimderiniń ishindegi eń kóp tutynylatyny – badam, suly jáne soıadan alynǵan sút ónimderi. Elimizde ósimdik shıkizatynan alynatyn sút naryǵy qarqyndy ósip keledi. Importtyq ósimdik sútin satyp alý 2021 jyly 2020 jylmen salystyrǵanda 50 paıyzǵa ósken. Laktozaǵa tózbeýshiligi bar tutynýshylar kúnnen-kúnge kóbeıip, dámdik talǵamdar ózgerip jatyr. Sondyqtan ósimdik negizindegi sút ónimderine suranys artyp keledi. Buǵan qosa, ósimdik súti laktozasyz ıogýrt pen balmuzdaq óndirisiniń shıkizaty bola alady ári qurǵaq túrinde botqaǵa qosatyn ıngredıent retinde qoldanylady. Bul laktozaǵa allergııasy bar tutynýshylar men vegetarıandyqtar úshin mańyzdy.
