«Zamanaýı úlgidegi eki mektepte bilim alýǵa nıettengen oqýshylar qatary kóbeıdi. Bilim sapasyn kóterý, balalarǵa tolyqqandy jaǵdaı jasaý úshin taǵy da eki Binom mektebin ashý týraly sheshim qabyldandy. Bul mektepte barlyq múmkindik bar. Soǵan saı mektep te úzdikterdiń biri bolýy qajet», dedi oblys ákimi Serik Shápkenov.
Máselen, D.Qonaev atyndaǵy Binom mektebinde 4 myń oqýshy bilim alady. Munda barlyǵy 160 synyp ashylǵan. Máselen, 22 lıseı synybynda 550 bala oqıdy. Al 10, 11-synyptarda jaratylystaný-matematıka baǵytynda oqytylady. Mektep dırektory Lázzat Dúısenbaevanyń aıtýynsha, bilim ordasynyń aýmaǵy 22 myń sharshy metrdi quraıdy. Munda 94 kabınet, onyń ishinde fızıka, hımııa, bıologııa pánderine arnalǵan alty keńeıtilgen zerthana men zerthanalyq bólmesi bar. Bilim ordasy segiz ınformatıka kabınetimen, eki sportzal, horeografııa zaly, 48 oryndyq mýltımedıa synyby, 50 oryndyq kınozal, 300 oryndyq akt zaly, oıyn bólmelerimen qamtylǵan. Al kitaphanaǵa 10 myń kitap qoıylǵan. Sondaı-aq 75 oryndyq monoblogi bar «Tanym» shyǵarmashylyq tehnologııalar ortalyǵy, ashana men medısınalyq pýnkt oqýshylardyń ıgiligine qyzmet etedi. Bilim ordasynda pishinder men materıaldarmen shyǵarmashylyq eksperıment jasaý úshin 3D-prınter, metall, aǵash oıý, mata óńdeý, tehnologııa, aspazdyq sheberhanalar, robottehnıka kabıneti bar. Sondaı-aq STEAM bilim berý kabınetimen, ár oqýshyǵa arnalǵan jeke lokermen qamtylǵan. Ǵımarat erekshe bilim berý qajettiligi bar balalar úshin jedelsatymen, pandýstarmen jabdyqtalǵan.
О́ńirde jańadan ashylǵan bilim oshaqtarynyń biri – Jańatalap aýylyndaǵy «Sarmat» mamandandyrylǵan mektep-ınternaty. Alǵash ret esigin ashqan bilim ordasynyń 7,8 jáne 9-synybynda 150 oqýshy oqıdy. Oqýshylarǵa 14 muǵalim dáris beredi. Al kelesi jyly oqýshylar sanyn 300-ge jetkizý kózdelip otyr.
«Bul mektep-ınternatta oqýshylarǵa jalpy orta bilimmen birge áskerı istiń qyr-syry oqytylady. «Sarmat» mektep-ınternaty – kópten kútken jobanyń biri. Ǵımarat qurylysy bastalǵaly beri bilim ordasynyń tujyrymdamasy, tárbıelik
jumys baǵyty aıqyndaldy. Mektep-ınternatqa qabyldaný úshin oqýshylar normatıv tapsyryp, testileýden ótti. Oqýshylardyń arasynan úzdikteri tańdaldy. Bilim men tárbıe – ajyramas uǵym. Munda oqýshylarǵa sapaly bilimge qosa, ulttyq tárbıe beriledi. Osynda dáris alatyn ár túlek Otanyna adal qyzmet etetin ofıserler korpýsynyń qataryn tolyqtyrady», dedi Atyraý oblysy ákiminiń orynbasary Jasulan Bısembıev.
«Sarmat» mamandandyrylǵan mektep-ınternatynda jaratylystaný-matematıka baǵytyndaǵy fızıka, bıologııa, hımııa, geografııa pánderi tereńdetilip oqytylady. Sondaı-aq áskerı beıindik pánder, sport, alǵashqy áskerı daıyndyq, bı, án, dombyra syndy úıirmeler ashylǵan. Mektep-ınternattyń janynda úsh qabatty jataqhana salynǵan. Oqýshylarǵa áskerı úlgidegi kıim, bes mezgil tamaq tegin beriledi. Pándik synyptardan bólek, áskerı daıyndyq úshin arnaıy jattyǵý alańy, zamanaýı zerthanalar jáne kitaphanamen qamtylyp otyr.
Atyraý oblysy
