Endi astanalyq ótinish bildirýshiler memlekettik qoldaý sharalary jóninde keńes ala alady, sondaı-aq jekelegen mamandyqtar, ásirese frılanserlerge arnalǵan mamandyqtar boıynsha kýrstan ótip, jumys tabýǵa múmkindik ashylyp otyr.
Astana ákimi Jeńis Qasymbektiń málimetinshe, «Joltap» jobasy aıasynda elordada barlyǵy 10 «Barshaǵa múmkindik» modýldik pýnkti jumys isteıdi. Aıtalyq, Jastar saraıy, «Ailand» SOO, «Vstrecha» SÚ, «Azııa Park» SOO, «Tulpar» SO sııaqty mekenjaılarda alǵashqy bes modýldik beketter jumysyn bastaǵan. Modýldik beketter kún saıyn saǵat 10.00-den 20.00-ge deıin jumys isteıdi.
Sondaı-aq qala basshysy «Joltap» jobasy Memleket basshysynyń ónimdi jumys oryndaryn qurýǵa áleýmettik saıasattyń qajettiligi týraly tapsyrmalaryn oryndaý maqsatynda júzege asyrylyp jatqanyn jetkizdi. Onyń aıtýynsha, joba tutastaı alǵanda qazirgi áleýmettik reformalarǵa tıimdi qosymsha bolyp otyr.
«Jobaǵa qoǵamdyq tamaqtaný, saýda, qurylys, kólik jáne qyzmet kórsetý salalaryndaǵy iri bıznes ókilderi men sala kóshbasshylary jumyldyryldy. Olardyń ishinde «BI Group», «Magnum», «Marwin», «Shaurma Food» jáne t.b. bar. Jobanyń birlesken operatory – «Jańa múmkindik» qoǵamdyq qory. Barlyq modýldik beketti «Halyq» qory usyndy», deıdi qala ákimi.
«Joltap» aıasynda turǵyndar qalanyń bos jumys oryndary bar «Jumys Tap» Telegram-bot sekildi quraldaryn paıdalana alady. Sonymen qatar shaǵyn bıznes ashýǵa arnalǵan nesıe berý baǵdarlamalary jóninde mamandyqtary boıynsha qysqa-merzimdi oqytýdan ótýge múmkindik bar.
«Jobanyń maqsaty – halyqtyń tabysynyń ósýi úshin múmkindikterdi tańdaýǵa kómek kórsetý. Oǵan óz mansaby men ózin-ózi tárbıeleý úshin jaýapkershilikti alýǵa daıyn kez kelgen adam qatysa alady», deıdi uıymdastyrýshylar.
