Sýretti túsirgen – Erlan OMAR, «EQ»
Qoǵam turaqtylyǵynyń basty faktorlarynyń biri – dinaralyq jáne etnosaralyq tatýlyqty damytý. Bul óz kezeginde ulttyq qaýipsizdiktiń negizgi bóligi. Qoǵamnyń damýy – kez kelgen azamatynyń kózqarastary men nanymdaryna tózimdilikpen jáne qurmetpen qaraýǵa negizdelgen. Osylaısha, Qazaq eli ultaralyq jáne dinaralyq tatýlyqtyń ózindik qaıtalanbas úlgisin qalyptastyrǵan. Elimizde úsh jyl saıyn ótip kele jatqan dinder sezi osyǵan dálel. Bul jıyn beıbitshilikti, kelisim men tózimdilikti adamzat ómiriniń aınymas qaǵıdattary dep sanaýǵa, dinder, konfessııalar, ulttar men etnostar arasynda ózara qurmet pen tózimdilikke qol jetkizýge, adamdardyń dinı sezimderin qaqtyǵystar men áskerı áreketterdi órshitý maqsatynda paıdalanýǵa jol bermeýge shaqyrady.
Dinaralyq jáne konfessııaaralyq suhbat dástúrlerin dinaralyq sezd túrinde nyǵaıtý, dinder men mádenıetter, órkenıetter arasyndaǵy dıalogti ilgeriletýge baǵyttalǵan jetinshi forýmnyń ótkenine de jyl toldy. Oǵan ıslam, hrıstıan, ıýdaızm, býddızm, sıntoızm, daosızm jáne basqa da dástúrli dinderdiń basshylary men kórnekti ókilderi qatysty. Sezdiń dıalog alańdarynda dinı qaýymdastyqtardyń rýhanı jaqyndasýy boıynsha mazmundy jáne keleli áńgime órbip, nátıjesinde birlesken deklarasııalar men úndeýler qabyldandy.
Sezd aıasynda «Qazirgi álemdegi rýhanı jáne moraldyq qundylyqtardy nyǵaıtýdaǵy dinderdiń róli», «Bilim men dinı aǵartýdyń dinder men mádenıetterdiń syılastyqta qatar ómir súrý jáne beıbitshilik pen kelisimdi nyǵaıtýdaǵy róli», «Dinı kóshbasshylar men memleket qaıratkerleriniń jahandyq dinaralyq dıalog pen beıbitshilikti ilgeriletýge, ekstremızmge, radıkalızmge jáne terrorızmge qarsy is-qımylǵa qosqan úlesi», «Áıeldiń qazirgi qoǵamnyń ál-aýqaty men turaqty damýyna qosqan úlesi jáne áıelderdiń áleýmettik mártebesin qoldaýdaǵy dinı qoǵamdastyqtardyń róli» atty ózekti taqyryptar kóterilip, utymdy usynystar ortaǵa tastalǵanyna kóziqaraqty oqyrman kýá.
Bul usynystar men bastamalar álemdi alańdatyp otyrǵan máselelerdiń sheshimin tabýǵa óz septigin tıgizbek jáne álemdik jáne dástúrli dinder kóshbasshylarynyń beıbitshilikti saqtaý jaıly tujyrymdary jahan turaqtylyǵynyń saqtalýyna óz úlesin qosady dep senemiz. Osyndaı mańyzy joǵary is-sharany ótkizý elimiz úshin úlken jaýapkershilik jáne mártebe. Elimiz dinaralyq tatýlyqtyń otandyq úlgisin halyqaralyq sahnada moıyndatty.
Maqsat RAMANQULOV,
Batys Qazaqstan oblysy
din isteri basqarmasynyń basshysy
