49 kılo salmaq dárejesindegi báseke kópshilik nazaryn ózine aýdardy. Sebebi bul salmaqta kil myqtylar jınaldy. Atap aıtsaq, basty favorıtter Qytaıdyń qos myqtysy – Hoý Chjıhýeı men Szıan Hýeıhýa. Alǵashqysy – Olımpıada jáne Álem chempıony, ekinshisi – Álemniń úsh dúrkin chempıony. AQSh-tyń ókili Djordan Delakrýz da osal emes. Ol – Panamerıka oıyndarynyń eki dúrkin chempıony. Rýmynııalyq Mıhaela Kambeı – 2021 jylǵy Eýropa birinshiliginiń qola júldegeri jáne 2023 jylǵy Eýropa chempıony.
Aspanasty eli burymdylarynyń arasyndaǵy tartys Szıannyń jeńisimen aıaqtaldy. Julqyp kóterýde ol 95 kılo salmaqty eńserse, serpe kóterýde 120 kılolyq nátıjemen álemdik rekordty jańartty. Qos saıystyń qorytyndysy – 215 kılo. Bul da álemdik rekord! Qansha tyryssa da, Hoý basty qarsylasyna jete almady. Ol odan tórt kılo qalyp qoıdy. Hoýdyń kórsetkishi – 211 (95+116) kılo. Qola medal Mıhaela Kambeıge buıyrdy. Bul salmaqta synǵa túsken Aınur Ábdihalyqova 151 (68+83) kılolyq nátıjemen 30 oryndy qanaǵat tutty.
Áıelderdiń asa jeńil salmaǵynda taılandtyq Chaýtra Promongol shashasyna shań juqtyrmady. Ol 179 (78-101) kılolyq ziltemirdi kóterip, byltyr Bogotada alǵan kúmisin bul joly altynǵa almastyrdy. Ekinshi oryndy Afrıka oıyndarynyń jeńimpazy, qurlyqtyń eki dúrkin chempıony, madagaskarlyq Rosına Randafıarıson enshiledi. Úshinshi satyǵa jastar arasyndaǵy Álem birinshiliginiń jeńimpazy, Eýropa chempıony túrkııalyq Jansý Bektash taban tiredi.
Erlerdiń 55 kılo salmaq dárejesinde Ernaz Alpysovqa úmit artqan edik. Alaıda ol 13-orynmen shekteldi. Ernazdyń nátıjesi – 233 (106+127) kılo. Bul salmaqta Laı Zıa Thanniń ekpinine eshkim shydamady. Kezinde jastar arasynda Álem jáne Azııa chempıony atanǵan 25 jastaǵy Vetnamnyń saıypqyrany 269 (123+146) kılolyq salmaqty eńserdi. Bul – onyń eresekter dýyndaǵy alǵashqy júldesi. Laıdyń otandasy Ngo Shon Kın kúmis alsa, Taılandtyń tastúlegi Nattavat Chomchýen qolaǵa qol sozdy.
