Festıval aıasynda kásipkerlerge arnaıy oryndar ázirlendi. Munda olar óz ónimderin saýdalady. Ashyq aspan astyndaǵy ashanada ázirlengen túrli til úıirer taǵamdar kópshilikke usynyldy. Baǵalary da qoljetimdi. Ulttyq sýsyndardan bólek, «Toqyraýyn» aýyz sý ónimderin óndiretin kásiporynnyń basshysy Záýre Merǵazyqyzy festıvalǵa 3 tonna sýsyn ákelipti. Buǵan qosa «100 ıgi is» aksııasy aıasynda Balqash qalasyndaǵy «Halyq bank» qyzmetkerleri Halyk Bank QR-kody arqyly tólem qyzmetin jasaǵandarǵa 1 teńgege sýsyn satty. Munda múmkindigi shekteýli jandarǵa da jaǵdaı jasaldy, ınvataksı qyzmet kórsetti.
Mýltfılm keıipkerleri men oıyn-saýyq baǵdarlamasy jaǵajaıdaǵy balalardyń kóńiline shýaq syılady. Al jastar jaǵy «Jastar taza Balqash úshin» aksııasyna jumyldy. Jaǵajaı voleıboly, armrestlıng, arqan tartý jáne «Kóńildi starttar» sııaqty jaǵajaıda týrnırler uıymdastyrylsa, jappaı júzý de jurttyń kóńilinen shyqty. Kól ústinde 500 metr qashyqtyqty baǵyndyrýǵa shyqqan júzýshilerdiń eń úlkeni – 58 jasta, al kishisi – 13-te. Belgilengen ýaqytta márege birinshi bolyp jetken Batyrhan Bolatbekov saıysqa tyńǵylyqty daıyndyqpen kelipti. Almaty qalasyndaǵy áskerı akademııada oqıtyn Batyrhan jarysqa qatysý úshin bir aı kólemde «Aq teńiz» basseıninde ábden shynyǵypty. Jaǵajaı voleıbolynan ótken doda da tartysty ótti. Kir tasyn kóterý saıysynda 65 kg salmaqta 16 kılolyq qos kir tasyn 38 ret kótergen Erasyl Alıev, 75 kıloda 101 ret kótergen Qobylandy Jaqypov chempıon atandy. Sondaı-aq qos 24 kılony 40 ret kótergen Dmıtrıı Kım 1-orynǵa kóterildi. Qol kúreste 65 kıloda Ernat Qaısaruly, 75 kıloda Nurlan Ádilov, 85 kıloda Islam Maıhy, 95 kıloda Evgenıı Moskın jeńimpaz atandy.
Sonymen qatar jasyleldikter arasynda ótken jaǵalaý voleıbolynda Aqtoǵaı aýdanynyń «Bektaý ata» komandasy 1-oryndy ıelense, arqan tartystan balqashtyq «Toqyraýyn» komandasy júldeger atandy. Sekirtpemen sekirý saıysynan «Bektaý ata» komandasynyń múshesi, aqtoǵaılyq Aqmaral Amanollaqyzy úzdik dep tanyldy. Kókshe teńizdiń jaǵasyndaǵy jaıdarly sátke kýá bolǵan Prıozersk qalasy «Jasyl el» jasaǵynyń múshesi Aıdos Qanatbaıuly «bul jıyn jańa qadamdarǵa bastaıdy», degen oı-áserimen bólisti.
– Memleket basshysy Qasym-Jomart Toqaev týrızmdi túletýge tapsyrma berdi. Osy baǵytta Balqashtaǵy jıyn jańa qadamdarǵa bastaıdy dep oılaımyn. Biz Prıozersk qalasynan keldik. «Qorjyntúbek» jáne «Torańǵalyq» atty eki komanda bolyp qalamyzdyń namysyn qorǵadyq. Alǵan áserim erekshe. Aıta ketý kerek, qazir «Jasyl el» jasaǵy tek jumys jasap qana qoımaı, túrli is-sharalarǵa da atsalysyp jatyr. Máselen, jaqynda ǵana nashaqorlyqtyń aldyn alý úshin sıntetıkalyq esirtkiniń zııany men shomylý maýsymyndaǵy qaýipsizdik erejelerin túsindirdi, – deıdi A.Qanatbaıuly.
«BalqashTourfest – 2023» festıvali ásem ánderimen, erekshe oıyn-saýyq baǵdarlamalarymen kópshilik kóńilin kóterdi. Kóbikti kesh pen estrada juldyzdarynyń merekelik konserti festıvaldy sátti túıindedi. Týrızmdi túletýge baǵyttalǵan «BalqashTourFest» festıvali dástúrge aınalmaq.
Qaraǵandy oblysy,
Balqash qalasy
