Búginde «óskende tankıst bolam» deıtin balany az kezdestiretinimiz belgili. Bir jaǵynan, Qudaıdyń bergen beıbit zamany «ushqysh», «tankıst» bolýdy armandaıtyn balalardyń sanyn barynsha azaıtsa, ekinshi jaǵynan tank aıdaýdan keıbir jas jetkinshekter úreılenetini de jasyryn emes. Biraq aramyzda tank sekildi kez kelgen kúrdeli áskerı tehnıkany urshyqsha ıire alatyn qazaq jastary az emes ekenin dáleldep júrgen zamandastarymyz jeterlik. Solardyń biri – 3-synypty serjant Rýstam Moldashev.
Tártip pen bilimdi, shydam men tózimdi talap etetin áskerı salany tańdaǵan keıipkerimiz Qostanaı oblysynyń Prıdorojnoe aýylynda ómir esigin ashqan. Áskerı qyzmetin 2013 jyly kelisimshart boıynsha «Shyǵys» óńirlik qolbasshylyǵyna qarasty Aıagóz garnızonynyń tank brıgadasynda kózdeýshi-operator bolyp bastaǵanda bul qyzmettiń óziniń oń jambasyna keletinin birden baıqapty. «Merzimdi áskerı qyzmetimdi aıaqtaǵannan keıin óz qalaýymmen osy salaǵa birjola bet burdym» deıdi ol.
Qazirgi ýaqytta 10810 áskerı bóliminiń 1-tank batalonynda rota serjanty laýazymynda qyzmet atqarady. Ol ózine senip tapsyrylǵan T-72 aýyr urys tehnıkasyn tııanaqty meńgergen. О́z bilgeni men kókeıge túıgenin úıretýden jalyqpaıtyn serjant qyzmettiń has mamany bolý úshin árdaıym bilimińdi arttyryp otyrý kerek degen pikirdi ustanady. «Degenmen tankıst bolam deıtin adamnyń júreginen, eń aldymen, otanshyldyq sezimi oryn alýy kerek dep oılaımyn. Ekinshiden, bolattaı myqty bolý qajet» deıdi ol.
Elimizdiń Qarýly Kúshterinde 10 jyldan astam qyzmet etip kele jatqan Rýstamnyń áskerı qyzmettegi jetistikteri az emes. Atap aıtqanda, ol áskerılerdiń halyqaralyq oıyndary aıasyndaǵy «Tank bıatlony» saıysynda Qarýly kúshterimizdiń qatarynda óner kórsetip, el namysyn qorǵap, 2016, 2017, 2019 jáne 2021 jyldary komandalyq esepte júldeli oryndardy ıelendi. Bul jarystarda ol tankte kózdeýshi qyzmetin atqarǵan. Osyndaı jetistikteriniń arqasynda onyń qajyrly eńbegi baǵalanyp, Qorǵanys mınıstriniń qolynan halyqaralyq oıyndarynda kórsetken sheberligi men adal qyzmeti úshin 2017 jyly «II dárejeli El qorǵany» medalin aldy.
Aıta ketsek, qazirgi tańda merzimdi áskerı qyzmetke kelgen jigitterge Gvardeısk garnızonynda tank basqarý mamandyǵy oqytylady. «Elimizdiń armııasynda T-72 urys tankileri qoldanylady jáne olar kez kelgen qaýipke toıtarys berýge 100% daıyn dep aıta alamyn. Men qazir Aıagóz garnızonyndaǵy tank brıgadasynda qyzmet atqaramyn. Artyq aıtqandyq emes, biz kún saıyn óz sheberligimizdi shyńdaımyz. Kúndelikti jaýyngerlik josparǵa sáıkes kóptegen tájirıbelik jattyǵýlardy jasaımyz» deıdi Rýstam Moldashev.
Bizdiń keıipkerimiz qyzmette adal dos, senimdi qarýlas bolsa, úıinde ónegeli áke. О́mirlik serigi Marına Moldashovamen áskerı qyzmette júrip tanysyp, búginde ómirdiń ystyq-sýyǵyn birge kórip keledi. Moldashovtar otbasynda Jasulan, Jasmın jáne Sanjar esimdi tátti balapandar ósip keledi.
Qyzmet jolynda túrli belesterdi ótkergen, sabyrly minezimen óz ortasynda bedeldi Rýstamnyń áriptesteri de onyń eńbeksúıgish, tabandy jan ekenin jasyrmaıdy. «Ol óziniń tártibi jáne berilgen tapsyrmalardy tyńǵylyqty oryndaýymen áriptesterine úlgi. Jaýyngerlik daıarlyq sabaqtarynda árqashan joǵary deńgeıden kórinedi. Baıraqty básekelerde elimizdiń abyroıyn asqaqtatyp júrgen batyr uldyń bizben birge qyzmet atqaratynyn maqtan etemiz», – deıdi 1-tank batalonynyń komandıri, maıor Rınat Saǵyndyqov.
Biz áńgime sońynda Rýstamǵa «Elimizdiń óz tankileri qashan shyǵady?» degen tosyn suraqty qoıdyq. «Qazirgi tańda bizde tankilerge kúrdeli jóndeý jasaıtyn kásiporyndar bar. Al óz tankimizdi shyǵarý bolashaqtyń enshisinde degen senimdemin. Sebebi tank – qurlyq áskerleriniń eń joıqyn kúshi» dep jaýap berdi.
Aıtpaqshy, 15 qyrkúıekte elimizde Tankıster kúni atalyp ótedi. Mereke qarsańynda óz isiniń maıtalmanyna qyzmette tabysty bolýyn, artynan ózi sekildi tank tizgindegen batyrlar ere berýin tiledik.
