Alty stýdentke jyldyq oqý grantyn tabys etken túlek – Erjan Tastambekov. Ǵylym jáne joǵary bilim mınıstrligi taratqan aqparatqa súıensek, jyldyq oqý grantyna úmitkerlerdi irikteý stýdentterdiń áleýmettik jaǵdaıyna, oqý úlgerimine jáne UBT-da jınalǵan upaı sanyna qaraı júrgizilgen. Ýnıversıtet prorektory Dýman Aıtmaǵambetov, oqý ordasynyń túlegi, Zebra Coffee kofehanalar jelisiniń negizin qalaýshy Erjan Tastambekov, ENU Endowment Fund ókilderi 1-kýrs stýdentterimen áńgimelesý ótkizipti. Nátıjesinde, kásipker 2023-2024 oqý jylynda fılologııa, sáýlet jáne qurylys, áleýmettik ǵylymdar fakýltetiniń daryndy stýdentterine qoldaý kórsetetin boldy.
– Grant alýshylardy irikteý arnaıy krıterııler boıynsha júrgizildi. Bıyl memlekettik grantqa bir-eki upaı jetpegen jáne ákimdikter men túrli qordyń granttaryn ıelenbegen, sondaı-aq ýnıversıtettegi oqý aqysyn tóleýge múmkindigi tómen stýdentterdiń anketalary qaraldy. Árıne, tańdaý kezinde biz daryndy jastardyń áleýmettik jaǵdaıyn da eskerdik. Eń aldymen, qoldaý men kómekke muqtaj nemese qıyn jaǵdaıǵa tap bolǵandarǵa basymdyq berildi. Belsendi stýdentterge de grant bólindi, – dedi E.Tastambekov.
Ámirhan Shegebaev UBT-dan 112 upaı jınaǵanymen, memlekettik grantqa qol jetkize almady. Daryndy sportshy ýnıversıtet túleginiń qoldaýymen bıylǵy oqý jylynda Áleýmettik ǵylymdar fakýltetinde tegin oqý múmkindigine ıe boldy. Ámirhan – sport sheberligine kandıdat. Shaıbaly hokkeıden jastar jáne mektep oqýshylary arasynda el chempıonattaryna, dopty hokkeıden qysqy gımnazıadaǵa qatysqan.
– Áńgimelesý barysynda ózimniń sportqa degen qushtarlyǵym erekshe ekenin aıttym. Oqýdy bitirgende sporttyń bedeli men deńgeıin arttyrýǵa kúsh salǵym keledi. Grant alǵanyma óte qýanyshtymyn jáne kásipker Erjan Tastambekov pen ENU Endowment Fund qoryna qoldaý kórsetkeni úshin alǵys aıtamyn, – deıdi Ámirhan.
Al Aqtóbeden kelgen Aılana Saparǵalı adamdardyń ómirlik máselelerin sheshýge kómekteskisi keledi. О́ıtkeni ol – bolashaq psıholog.
– Shynymdy aıtsam, áńgimelesýge qatysqanymmen, dál mundaı bir ǵajaıyp kútken joq edim. Grant ıegeri bolǵanymdy habarlaǵanda sene almadym. Bul maǵan da, anam úshin de kútpegen, keremet jańalyq boldy. Bala kezimde Astanaǵa jıi kelip, Eýrazııa ýnıversıtetiniń ǵımaratyna qarap, osy bedeldi oqý ordasynda bilim alýdy armandaıtynmyn. Sapaly bilim alyp, suranysqa ıe maman bolyp, bolashaqta adamdardyń ómirlik máselelerin sheshýge kómekteskim keledi, – deıdi Aılana.
Iriktelgen izdenýshilerdiń qatarynda Jambyl oblysy Qarataý qalasynan kelgen Arýjan Tóregeldi men astanalyq Symbat Bazarbaı da bar. Ekeýi de – fılologııa fakýltetiniń stýdenti. Jyldyq grant ıeleri mesenat pen ýnıversıtet senimin aqtaýǵa tyrysamyz deıdi.
Eske sala keteıik, 2022 jyly ýnıversıtet túlekteriniń bastamasymen ENU Endowment Fund qurylǵan bolatyn. Qor arqyly daryndy jáne muqtaj stýdentterge qoldaý kórsetiledi.
