Endi bul túıtkildiń túıinin tarqatý úshin shahardyń soltústik baǵytynan aınalma jol qurylysy bastaldy. Onyń uzyndyǵy – 26 shaqyrym. «Jol aktıvteriniń ulttyq sapa ortalyǵy» RMK Atyraý oblystyq fılıalynyń bólim basshysy Nurlan Jantýrınniń aıtýynsha, Jaıyq ózeniniń oń jaǵalaýyndaǵy «Atyraý – Oral» respýblıkalyq tasjolynyń 10 shaqyrymyn jáne sol jaǵalaýdaǵy «Atyraý – Inder» jolynyń 9 shaqyrymyn qosý úshin kópir salynady.
«Eki kúrejolmen qıylysatyn eki jolaıryǵy men ózen ústinen bir kópir salynady. Fılıaldyń mamandary jol qurylysyna paıdalanylatyn topyraq qabatynan synama alyp, udaıy tekserý júrgizedi. Bul jol Atyraý qalasyndaǵy kólik qozǵalysynyń aǵynyn tómendetýge, negizgi avtokólik joldaryndaǵy keptelisti, tranzıttik kólikter sanyn azaıtýǵa múmkindik beredi», deıdi N.Jantýrın.
Oblystyq jolaýshylar kóligi jáne avtomobıl joldary basqarmasynyń basshysy Samat Aıtqalıevtiń deregine qaraǵanda, «QazAvtoJol» UK» AQ tapsyrysymen ekinshi kategorııa sanatynda salynatyn aınalma jol qurylysynyń merdigeri retinde «AzVitr» jáne «Aqjol qurylys» kompanııasy tańdalǵan. Jol qurylysyn 2024 jyldyń sońyna taman aıaqtaý kózdelgen. Jol qurylysynyń quny 28 mlrd teńgeni quraıdy.
«Qazir soltústik aınalma avtojoldyń qurylysy qarqyndy júrip jatyr. Qurylys júrgiziletin 12 shaqyrym aýmaqta ósimdikter qabaty alynyp, 101 565 tekshe metr joldyń negizgi qabaty tóseldi. Atyraýdan Reseıdegi Astrahan óńirine qatynaıtyn tasjoldyń qıylysynda qubyr úlgisindegi ótkeldiń qurylysy bastaldy. Oǵan 50 qazyq qajet. Onyń 12-si qaǵyldy», dep málimdedi S.Aıtqalıev.
Atyraý oblysy
