Endi shıkizat óndirýshi ǵana emes, óńdeýshi ekonomıkany qalyptastyrý ońaı sharýa emes, ol – kóp ýaqytty jáne qarajatty talap etetin jumys. Biraq biz qaıtkende de sol maqsatqa jetýimiz kerek. Ony Prezıdent te áldeneshe qaıtara aıtyp, ınvestısııany soǵan baǵyttaýdy tapsyrdy.
Muny elimizdiń bolashaǵy qanshalyqty mańyzdy ekenin árqaısymyz jaqsy túsinip otyrmyz. Biz shyn máninde, shıkizat satyp qana kún kóretin elge aınalyp kettik. Jerasty baılyǵymyzdyń negizgi paıdasyn ózimiz emes, sony óńdep satatyn memleketter kórip jatyr. Qoınaýymyzdan qazyp alynyp jatqan shıkizat qalpyna keletin resýrs emes, ol bir kúni taýsylady. Sol kezde taqyrǵa otyryp qalmas úshin, biz qazirden óńdeýshi ekonomıkaǵa jáne ony ártaraptandyrýǵa kóshýimiz kerek. Qazaq kásipkerleri de óńdeýshi ekonomıkany qalyptastyrýǵa daıyn jáne qabiletti. Bul elimizdiń damýyna jańa serpilis beredi.
Joldaýda kóterilgen ekonomıkamyzǵa áseri bar taǵy bir soqtaly bastama – elimizde atom elektr stansasyn salý úshin referendým ótkizý. Bul – kópten daý bolyp kele jatqan másele. Prezıdent osyny sheshý úshin halyqtyń óz únin estýdi jón dep taýyp otyr. Degenmen AES qurylysy jaıynda referendým ótkizer aldynda halyq arasynda túsindirme jumystaryn júrgizý kerek. О́ıtkeni adam ne úshin daýys beretinin bilgeni jón. AES týraly bilimimiz azdaý. «Men qoldaımyn», «Men qarsymyn» dep jaýap bere salýǵa bolmaıdy. Biz onyń ne úshin salynatynyn, nelikten kerek ekenin bilgenimiz durys. Sondyqtan halyq arasynda aldymen túsindirme jumystary júrgizilse quba-qup. Al óz basym AES qurylysyn júrgizýde Fransııamen seriktes bolýdy tańdar edim.
Aıdarbek QOJANAZAROV,
Májilis depýtaty
