Aýdan ortalyǵynda ornalasqan teatrdyń kórermeni kóp. Al jańa maýsymnyń ashylýyna aýdan basshylary, mádenıet salasynyń ardagerleri qatysyp, ujymǵa sáttilik tiledi. «Kezinde Júsipbek Aımaýytov «... teatr degen nárse ermek emes, kóńil kóterý de emes, ol – úlgi, ol – tárbıe, óner orny» degen. Teatr sahnasynan árbirimizdiń ómirimizde jıi kezdesetin izgilik pen mahabbat, zulymdyq pen qııanat, bas paıdasyn ǵana oılaıtyn «menmendik» sekildi qasıetterdiń araqashyqtyǵyn, olardyń aıyrmasyn kórýge bolady. Zulymdyqty synaı otyryp, adamdarǵa izgilik pen ımandylyq jolyna baǵa da bere alamyz», deıdi aýdan ákiminiń orynbasary Marat Aınabekov. Al teatr dırektory Oral Kamal 55 jyldyq tarıhy bar teatrdyń jetistikteri men ótkenine toqtalyp, qýyrshaq teatryn qolǵa alyp jatqanyn jetkizdi. Sondaı-aq jyl sońyna deıin birneshe jańa týyndy sahnalanbaq.
Teatr ujymy jańa maýsymda taǵy bir tyń dúnıeni kópshilikke usyndy. A.Volodınniń «Mahabbat ber!..» dramasyn sahnalaǵan qoıýshy-rejısser Arıdash Ospanbaeva bolsa, rejısser assıstenti Eldos Aqylov, qoıýshy sýretshisi Baqyt Sraılov. Memleket irgesiniń berik bolýy úshin árbir otbasynyń bekem bolǵany mańyzdy ekenin uǵyndyrýǵa umtylatyn dramada sońǵy kezderi otbasy qurǵan jastardyń da, eresekterdiń de arasynda ajyrasý faktileriniń jıilep ketkeni, shańyraqtyń shaıqalý sebepteri, óz baqyttary úshin sońyna deıin kúrese almaýdyń saldary keńinen sýretteledi. Erli-zaıyptynyń syılastyǵyn, izet-qurmetin qalaı saqtap, nyǵaıtýǵa bolady? Dos pen dostyń, áıeli men kúıeýiniń aldyndaǵy mindetteri neden turady degen suraqtarǵa jaýap izdeıdi. О́ner ujymynyń jańa týyndysy kórermen kóńilinen shyqty. О́nersúıer qaýym ártisterdiń árbiri ózderine bekitilgen obrazdy keremet alyp shyqqanyn, qoıylymnan rýhanı nár alyp, belgili bir másele boıynsha oı túıgenderin aıtady.
Túrkistan oblysy
