Jobanyń iske asýyna Qaraǵandy oblys ákimdigi qoldaý bildirip, ulttyq rýhanııattyń úlken janashyry Dúısen Qaseıinov muryndyq bolǵan.
– Mundaı nysandar baýyrlas halyqtar birin-biri jaqsy tanýyna áser etedi. Sondyqtan eki qandas eldiń yntymaǵyn ydyratpas osyndaı tarıhı muralarymyzdyń sany arta bersin. Eki eldiń tyǵyz baılanysyn bizdiń urpaqtar bilip ósýi kerek, – dep atap ótti Etımesgýt aýdanynyń basshysy Enver Demırel.
Túrik aǵaıyndardyń aıtýynsha, endi bul eskertkish eki el arasyndaǵy aınymas birliktiń belgisi bolmaq. Týyndy avtory Murat Mansurov tulǵanyń beınesin músindeý ońaıǵa túspegenin aıtady. «Onyń órligi, boıyndaǵy minezin bir beınege syıǵyzýǵa tyrystyq», – deıdi avtor. 2,5 tonna qoladan quıylǵan eskertkish – Qaraǵandy oblysy ákimdiginiń Túrkııa eline tartýy.
Osynaý Túrkııa Respýblıkasynyń 100 jyldyǵyna oraı uıymdastyrylǵan sharaǵa Táttimbet Qazanǵapulynyń urpaǵy arnaıy kelipti. Anadolyda babasyna arnalyp, boı kótergen eskertkish – qazaq eli úshin zor mártebe ekendigin aıtady.
«Táttimbet babamyzdyń qurmetine qoıylǵan eskertkishtiń ashylý rásimine kýá boldym. Túrik aǵaıyndarǵa aıtar alǵysymyz sheksiz. Tórin usynyp jatyr. Eskertkishtiń ashylýy tek Táttimbet urpaqtarynyń, Qaraǵandy eliniń emes, jalpy qazaqqa degen zor qurmet», deıdi kúıshiniń urpaǵy Slámıden Nurkenov.
Táttimbet Qazanǵapulynyń esimi ulyqtalǵan jerde únemi Táttimbet halyq aspaptary orkestri júredi. Bul joly da ónerpazdar Antalııa, Ankara men Alanııaǵa baryp, jergilikti turǵyndarǵa án keshin uıymdastyrdy.
Osydan jeti jyl buryn Halyqaralyq TÚRKSOI uıymynyń uıymdastyrýymen Ankara qalasynda Táttimbet Qazanǵapuly atyndaǵy saıabaq ashylǵan-tyn. Bul da – Qazaqstannyń Túrkııadaǵy Elshiliginiń qoldaýy jáne Qaraǵandy oblysynyń ákimdiginiń atsalysýymen júzege asqan edi. Saıabaq – Ankara qalasy Etımesgýt mýnısıpalıteti turǵyndarynyń ıgiligine berilgen. Etımesgýt aýdanynyń basshysy Enver Demıreldiń aıtýynsha, bul jerde ataqty kúıshi Dına Nurpeıisova men aǵartýshy Ahmet Baıtursynulynyń esimi berilgen qos saıabaq ta bar.
Anadolydaǵy aǵaıynnyń qazaqqa degen qurmeti osyndaı asqaq bolyp tur.
