«US Open» máresine jetti

Jartylaı fınalda Danııl Medvedev álemniń birinshi raketkasy, ıspanııalyq Karlos Alkarastan aılasyn asyrǵanda barsha sarapshy men jankúıer aqtyq synda ol Novak Djokovıchke laıyqty qarsylyq kórsetip qana qoımaı, bas júldeni oljalaýy da ábden múmkin dep topshylaǵan edi. Biraq olaı bolmady. Fınaldyq saıys Serbııa sańlaǵynyń aıqyn basymdyǵymen ótti. Báseke barysynda reseılik oıynshy birde-bir ret breık jasaǵan joq. Al Novak bolsa, birneshe ret Danııldiń bergen dobyna ıelik ete aldy. Nátıjesinde, úsh settik saıys 6:3, 7:5, 6:3 esebimen aıaqtaldy. Bul kezdesý 3 saǵat 17 sekýndqa sozyldy.

Esterińizge sala keteıik, Novak bıylǵy US Open týrnırinde Danııl Medvedevten bólek, Aleksandr Mıýller (Fransııa), Bernabe Sapata-Mırales (Is­panııa), Laslo Dere (Serbııa), Borna Goıo (Horvatııa), Teı­lor Frıs (AQSh) jáne Ben Shel­tondy (AQSh) shań qaptyr­dy. Reseıdiń ókili Karlos Al­karastan bólek, Atılla Balaj (Majarstan), Krıstofer O’Kon­nell (Aýstralııa), Sebastıan Baes (Ar­gentına), Aleks de Mı­nor (Aýs­tra­lııa) jáne Andreı Rýblevten (Reseı) basym tústi.

Osylaısha, Novak Djokovıch «Úlken dýlyǵa» sanatyndaǵy jarystarda jeńip alǵan júldeler sanyn 24-ke jetkizdi. Bul – er­ler arasyndaǵy rekordtyq kór­setkish. Tarqatyp aıtsaq, ol US Open dodasynda tórt márte daralansa, Rolan Garrosty úsh ret utty. Ýımbldonnyń jeti dúrkin jeńimpazy atansa, Aýstralııanyń ashyq birinshiliginde 10 ret al­dyna jan sal­mady. Novak atal­ǵan jarystardyń fınalynda barlyǵy 47 ret óner kór­setti. Bul da rekordtyq ná­tı­je. Salystyrmaly túrde al­­saq, ıspanııalyq Rafael Na­­­dalǵa bul beles 22 ret ba­ǵyn­sa, shveısarııalyq Rodjer Fe­dererdiń 20 márte me­reıi ús­tem boldy. Al áı­el­­der ara­syn­da Mar­ga­­ret Kort­tyń sho­q­tyǵy bıik. О́tken ǵa­syrdyń alpysynshy jáne jetpisinshi jyldary atoı salǵan Aýstralııanyń ókili de «Úlken dýlyǵa» dodalarynda 24 ret top jardy. Desek te Djokovıchtiń bul rekordty jańartýyna áli de múmkindigi bar. О́ıtkeni Kort úlken sporttan áldeqashan qol úzip ketken, al 36 jastaǵy serbııalyq tennısshi bul kúnderi babynda. Osy ta­bysynyń ar­qa­synda Novak álemdik reı­tıngte qaıta kósh bastady.

Áıelderdiń juptyq saıysy Gabrıela Dabrovskı (Kanada) men Erın Rýtlıftiń (Jańa Zelandııa) jeńisimen aıaqtaldy. Fınalda olar Laýra Zıgemýnd (Germanııa) pen Vera Zvonarevany (Reseı) utty – 7:6, 6:3. Erlerdiń juptyq básekesinde Radjıv Ram (AQSh) men Djo Solsberıdiń (Ulybrıtanııa) baǵy jandy. Sheshýshi tusta olar Rohan Bo­panna (Úndistan) men Mettıý Ebdendi (Aýstralııa) súrindirdi – 2:6, 6:3, 6:4.

Qazaqstan tennısshiler ja­ıyn­da aıtar bolsaq, AQSh-tyń ashyq birinshiliginiń jekelegen saıysyndaǵy eń úzdik kórsetkish Elena Rybakınaǵa tıesili. Ol Marta Kostıýk (Ýkraına) pen Aıla Tomlıanovıchti (Aýstralııa) utyp, úshinshi kezeńde Sorana Krystıaǵa (Rýmynııa) ese jiberdi. Iýlııa Pýtınseva tusaýkeser kezdesýinde tize búkti. Italııalyq Martına Trevızandy alǵashqy sette 6:0 esebimen utqanymen, odan keıin eki ret taı-breıkte utyldy. Erler arasynda synǵa túsken Aleksandr Býblık pen Tımofeı Ska­tovtyń ekeýi de alǵashqy aınalymnan asa almady. Býblık Domınık Tımge (Aýs­trııa), Skatov Aleks de Mınorǵa (Aýs­tralııa) jol be­rdi. Buǵan deıin ha­bar­laǵanymyz­daı, esesine Qa­zaq eli­niń jankúıerleri Anna Danılınanyń je­ńisine erekshe shattandy. Aralas juptar saıysynda jerlesimiz fın­lıandııalyq Harrı Helııovaaramen birge qarsylas shaq kel­tir­meı, bas júldeni oljalady.