Atyraý oblystyq memlekettik kirister departamentiniń qyzmetkerleri keıingi bir aıda kóleńkeli ispen aınalysqandardyń birneshe zańsyz áreketin áshkereledi. Ásirese, sáıkestendirý quraldarymen tańbalanýǵa jatatyn aksızdeletin ónimderdi zańsyz satý deregi beleń alyp tur. Sondaı derektiń birin óńirlik ekonomıkalyq tergeý departamentiniń qyzmetkerleri Atyraý qalasyndaǵy qoımalar men dúkenniń birine júrgizgen tekserý kezinde anyqtaǵan. Tekserý jumystary kezinde qoıma men dúkennen elektrondyq temeki, veıp qurylǵylar, suıyqtyq túrindegi 2,5 myńnan astam temeki buıymy anyqtaldy. Bul zattardyń barlyǵy saýdaǵa zańsyz shyǵarylǵan. Zańsyz aınalymnan alynǵan temeki óniminiń naryqtaǵy quny shamamen 6,7 mln teńgeni quraıdy.
Ekinshi derek te temeki ónimin zańsyz satýǵa qatysty bolyp otyr. Departament qyzmetkerleri bir kásiporynnyń qyzmetin memlekettik kirister organdarynda temeki ónimderin kóterme satýshy retinde tirkeýsiz júzege asyryp kelgenin anyqtady. Kásiporynnan 69 qorapqa salynǵan 96 myń zańsyz temeki ónimi tabyldy. Zańsyz ónimniń jalpy quny – 67 mln 178 myń teńge.
Tipti munaı ónimderin zańsyz satatyndar bar. Máselen, ótken aptada Atyraý qalalyq memlekettik kirister basqarmasynyń qyzmetkerleri munaı ónimine jatatyn 3 tonna dızeldi zańsyz satýdyń jolyn kesti. Osy isti kásipke aınaldyrǵysy kelgen bir adam anyqtaldy. Kúdikke ilingen qala turǵyny 3 tonna dızel otynyn arnaıy kólikpen tasymaldaǵan.
«Aksızdeletin ónimderdiń zańsyz aınalymyn anyqtaýǵa baılanysty is-sharalar jalǵasyp jatyr. Zańsyz aınalymnan alynǵan ónimderge, ony satqan adamdarǵa qatysty jınaqtalǵan is materıaldary sotqa joldandy», dep habarlady departamenttiń baspasóz qyzmeti.
Atyraý oblysy
