Onyń aıtýynsha, «Kúshti Prezıdent – yqpaldy Parlament – esep beretin Úkimet» formýlasy nyǵaıyp, adam quqyǵyn qorǵaý salasynda mańyzdy qadamdar jasalyp, zań ústemdigi men ádildikti qamtamasyz etý baǵytynda aýqymdy jumys atqarylyp jatqanyn atap ótti.
Joldaýda saıası jáne áleýmettik-ekonomıkalyq qaıta qurýǵa qatysty kóptegen másele qamtyldy. Osy oraıda mazmuny erekshe kelesi tarmaqtardy atap ótkim keledi.
Aqorda men Úkimettiń quzyreti. Prezıdent Toqaevtyń paıymdaýynsha, Úkimet bıýrokratııaǵa jáne sózbuıdaǵa salynbaı, Prezıdent Ákimshiligine jaltaqtamaı, ekonomıkany derbes basqarýdyń barlyq ádis-tásilin qolynda ustaýǵa tıis. Toqaev Prezıdent Ákimshiligi basty «saıası shtab» retinde memleketti áleýmettik-ekonomıkalyq damytýdyń strategııalyq baǵyttaryna, ishki jáne syrtqy saıasat, qorǵanys jáne qaýipsizdik, quqyq jáne kadr saıasaty máselelerine barlyq kúsh-jigerin jumyldyratynyn atap ótti.
Ákimderdi saılaý. Aýdandar men oblystyq mańyzy bar qalalar ákimderin tikeleı saılaý ótedi. Jospar boıynsha olardyń 45-i qanatqaqty rejimde tańdalady. Prezıdent aýdan ákimderine bıýdjetti derbes qalyptastyrý quqyǵyn berý týraly nusqaý beredi.
Atom energetıkasynyń damýy. Qazaqstan Prezıdenti elde atom elektr stansasyn salýdyń qajet ekenine kúmán keltirgen joq. «Atom elektr stansasyn salý nemese salmaý máselesi – elimizdiń bolashaǵyna qatysty asa mańyzdy másele. Sondyqtan ony jalpyulttyq referendým arqyly sheshken jón dep sanaımyn. Naqty merzimin keıin anyqtaımyz», dedi Q.Toqaev.
Qorǵanys-ónerkásip keshenin nyǵaıtý. Bul sala damyǵan elderdiń ulttyq qaýipsizdigin qamtamasyz etý isinde basty ról atqarady. «Osy oraıda ımportqa táýeldilikti azaıtýǵa múmkindik beretin, jergilikti ónim úlesi joǵary óndiris keshenin qurý – asa mańyzdy mindet. Bizdiń armııamyz joǵary tehnologııaly qarý-jaraqpen jáne áskerı tehnıkamen, sonyń ishinde brondy tehnıkamen, ushqyshsyz basqarylatyn ushý apparattarymen, qazirgi zamanǵy atys qarýlarymen jabdyqtalýǵa tıis», dep tapsyrma berdi Qazaqstan Prezıdenti.
Jańa mınıstrlikter qurý. Memleket basshysy Sý resýrstary jáne ırrıgasııa mınıstrligin qurýdy usyndy. «Elimiz úshin sýdyń mańyzy munaı, gaz nemese metaldan kem emes. Sý sharýashylyǵy júıesin tıimdi damytý máselesimen derbes mekeme aınalysýy qajet dep sanaımyn», dedi Q.Toqaev. Taǵy bir jańa vedomstvo retinde Kólik mınıstrligi qurylmaq. Qazaqstan Prezıdentiniń paıymdaýynsha, kólik-logıstıka salasy ekonomıkany alǵa bastaıtyn basty kúshtiń birine aınalýǵa tıis. «Qazaqstan soltústik pen ońtústikti, batys pen shyǵysty baılanystyratyn jahandyq jolaıryqta ornalasqan. Bul bizdiń elimizge zor múmkindik berip otyr», deıdi Memleket basshysy.
Prezıdent Toqaevtyń Joldaýy Qazaqstandaǵy atqarýshy bılik júıesin qaıta qurýdy kózdeıdi. О́ıtkeni reformalardyń negizgi mindeti atqarýshy bılik júıesine júkteledi. Úkimettiń kadrlyq transformasııasy Memleket basshysynyń Joldaýynan keıin birden bastaldy. El úkimetinde de, Prezıdent Ákimshiliginde de kadrlyq ózgerister boldy.
Aleksandr SINKER,
Shyǵys Eýropa jáne TMD elderi ınstıtýtynyń dırektory
