Foto: ashyq derekkóz
«Joldaýda zańnamaǵa shaǵyn kásipkerlik sýbektilerin irilendirýge yntalandyratyn ózgerister engizýdi tapsyrdym. Salyq sharalary, tekserýshi organdardyń tarapynan júrgiziletin tekserýlerge belgili bir ımmýnıtet qalyptastyrý, sondaı-aq mamandandyrylǵan qoldaý quraldary men memlekettik tapsyrystarǵa qol jetkizý osy yntalandyrý sharalarynyń qataryna kirýge tıis.
Mysaly, memlekettik qarjylyq qoldaýdyń erekshe sharalaryn usyný, sondaı-aq standartty salyq rejıminde jumys isteıtin bıznes úshin memlekettik tenderlerge jeńildikpen qol jetkizý máselelerin pysyqtaý kerek», dedi Memleket basshysy.
Prezıdenttiń aıtýynsha, elimizde qandaı da bir qıyndyqtarǵa qaramastan, memlekettiń qoldaýynsyz tabysty damyp, eksporttyq naryqtardy ıgerip jatqan birneshe júz ǵana orta kásiporyn bar. Bul rette, olardyń kóbi tekserýshi organdardyń qýdalaýynan qorqyp, osy ýaqytqa deıin memlekettik kómekten bas tartqan.
«Bul jerde arnaıy tásil kerek. Eger bıznes óz mindettemelerin oryndap jatsa jáne kózdegen maqsattaryna qol jetkizse, onda birde-bir tekserýshi jobany iske asyrý kezeńinde de, odan keıin de oǵan kedergi keltirmeýge tıis», dedi el Prezıdenti.
Sonymen qatar Memleket basshysy keıde bıznesti kásipkerlikpen aınalysý úshin emes, memlekettik qoldaýǵa ıe bolý maqsatynda quratyn jaǵdaılar kezdesetinin aıtty. Nátıjesinde memlekettik qoldaý sharalarynyń ekonomıkalyq qaıtarymy jumsalǵan bıýdjet qarjysynyń kólemine saı kelmeıdi.
«2015-2021 jyldary bıznesti memlekettik qoldaý kólemi (7 trln teńge) qoldaýǵa ıe bolǵan kompanııalardan túsken salyq túsimderiniń somasynan 1,5 ese asyp tústi (4,5 trln teńge). Mundaı jaǵdaı jyl saıyn qaıtalanady. Bıznesti yntalandyrý tásilderin ózgertýge baǵyttalǵan buǵan deıingi áreketter sátsiz boldy.
Osyǵan baılanysty Úkimetke qoldaý sharalaryna qatysty tetikterdi sapaly túrde jańǵyrtýdy tapsyramyn», dedi Qasym-Jomart Toqaev.
