Kásibı deńgeıdi jetildirýge elimizdiń barlyq óńirinen elýden astam ofıser qatysty.
Jıynnyń basty maqsaty - batalondyq býyn ofıserleriniń kásibı-laýazymdyq jáne ádistemelik daıarlyǵynyń deńgeıin arttyrý jáne kúndelikti qyzmetke basshylyqty jáne jaýyngerlik daıarlyqty uıymdastyrýdy reglamentteıtin Ishki ister mınıstrligi men Ulttyq ulannyń quqyqtyq aktileriniń talaptaryn biryńǵaı túsinýge qol jetkizý.
Dáristerdi ótkizý baǵdarlamasyndaǵy sabaq kestelerine sáıkes bes kún ishinde batalondyq býyn ofıserlerinde áskerlerdiń qyzmettik-jaýyngerlik qyzmetiniń negizgi basymdyqtaryn, fýnksıonaldyq mindetterin, jalpy áskerı jarǵylardy, onyń ishinde atys, dene shynyqtyrý, áskerı-ınjenerlik daıarlyq, RHBZ jáne tehnıkalyq daıarlyq boıynsha praktıkalyq daǵdylardy aıqyndaıtyn basshylyq qujattar men dırektıvalardy bilý boıynsha synaqtar qabyldanady. Qarý-jaraq pen áskerı tehnıkanyń, arnaıy quraldardyń, baılanystyń taktıkalyq-tehnıkalyq sıpattamalaryn bilý, sondaı-aq qatysýshylarmen qyzmettik-jaýyngerlik qoldaný taktıkasy, Memlekettik-quqyqtyq, ádistemelik daıarlyq jáne áskerı topografııa boıynsha teorııalyq jáne praktıkalyq sabaqtar ótkiziledi.
Aıta ketý kerek, sabaqtyń negizgi bóligi 3477 áskerı bóliminiń Daǵdarysqa qarsy oqý ortalyǵynda ótedi. Alǵashqy kúni ofıserler tańerteńnen bastap dene shynyqtyrý, memlekettik-quqyqtyq daıyndyq, sondaı-aq basshylyq qujattar men jalpy áskerı jarǵy boıynsha synaqtar tapsyrdy. Sodan keıin komandırlermen «Rotalyq taktıkalyq oqý-jattyǵýlardy daıyndaý jáne ótkizý ádistemesi. Jaýyngerlik atyspen taktıkalyq oqý-jattyǵýlardy daıyndaý erekshelikteri» jáne «Lazerlik atý jáne atý ımıtatorlary bar ekijaqty jekpe-jektiń trenajerleri men atý tırin paıdalana otyryp, keshendi sabaqtardy daıyndaý jáne ótkizý ádistemesi» kórsetpeli sabaq ótkizildi.
Al, ekinshi kúni – Daǵdarysqa qarsy oqý ortalyǵynyń polıgonynda sardarlar Ulttyq ulanda qarýlanǵan ártúrli pozısııalar men qarý-jaraq túrlerin: tapanshalardy, avtomattardy, mergendik myltyqtardy, granatometterdi jáne qozǵalmaıtyn, paıda bolatyn jáne qozǵalatyn nysandarǵa iri kalıbrli pýlemetterdi atý boıynsha óz sheberlikterin kórsetti. Sondaı-aq jaýyngerlik granata da laqtyrdy. Sonymen qatar, komandırler AK-1 avtomaty men PM-1 tapanshasynan sporttyq atýdan baq synady. Sabaqtyń maqsaty – komandırler keıinnen baǵynyshty jeke qurammen osyndaı sabaqtar ótkizýi úshin bilim men daǵdylardy jınaý. Odan keıin ári batalon býynynyń komandırleri úshin «Batalonnyń dalalyq shyǵýyn uıymdastyrý jáne ótkizý ádistemesi» jáne «Jeke quram men tehnıkaǵa arnalǵan transheıalardy, ot jaǵýǵa arnalǵan qurylystardy jáne baspanalardy (qolda bar materıaldar men tabeldik quraldardan jasalǵan dalalyq qurylystardy) salý, jabdyqtaý jáne búrkemeleý» taqyryptarynda kórneki sabaqtar usynyldy. Sonymen qatar, ofıserler dala lagerin qurý erejelerimen jaqynyraq tanysyp, bekinistiń zamanaýı úlgilerin kórdi. Budan ári tótenshe jaǵdaı engizý jaǵdaıynda áskerı jasaqtar men Ulttyq ulan bólimsheleriniń qyzmettik qoldanylýy aıqyn kórsetildi.
Jıyn jetekshisi, Ulttyq ulan Bas qolbasshysynyń orynbasary general-maıor Baýyrjan Ábjanovtyń aıtýynsha, jıyndardyń mindetteri laýazymdy tulǵalardyń kásibı deńgeıin arttyrý boıynsha biryńǵaı tásildi ázirleý, ozyq tájirıbemen almasý, komandırlerdiń atys, dene shynyqtyrý jáne ádistemelik daıarlyǵyn tekserý boldy.
«Bul praktıkalyq sabaqtar batalon býynyn daıyndaý turǵysynan mańyzdy kezeń bolyp tabylady. Osyndaı sabaqtardyń arqasynda ofıserler ózderiniń fýnksıonaldyq mindetterin sheber jáne senimdi oryndaý úshin kásibı daıyndyqty jetildiredi. Bizdiń Joǵarǵy Bas Qolbasshymyz Qasym-Jomart Toqaev «Batyl toıtarys – 2023» jattyǵýynda: «Bizdiń áskerimiz kásibı deńgeıi joǵary, utqyr jáne eń kúrdeli jaýyngerlik tapsyrmalardy oryndaýǵa daıyn bolýy qajet» degen bolatyn. Sondyqtan bizge júktelgen tapsyrmalardy múltiksiz oryndap shyǵý úshin úshin árbir ofıserimiz óz isin kásibı deńgeıde meńgerýi qajet. Sol sebepti Joǵarǵy Bas qolbasshynyń, Ishki ister mınıstri men Ulttyq ulan Bas qolbasshysynyń talabyna oraı jańa formatta Ulttyq ulannyń jeke quramy men komandırleriniń jaýyngerlik daıarlyǵyn shyńdaýdamyz», dep atap ótti general-maıor B.Ábjanov.
«Batalon komandırlerine joǵary sapadaǵy bilim berilip, zamanaýı tehnıkalardy qoldaný tártibi túsindirilip jatyr. Budan bólek bilikti áskerı qyzmetshiler jyldar boıy jınaǵan tájirıbelerimen bólisip jatyr. Búgin atys alańynda ártúrli qarý túrlerinen oq atý boıynsha synaq tapsyryp jatyrmyz. Olardyń arasynda bizdiń batalondarǵa jańadan beriletin NSVP qarýynan oq attyq. Jańa taktıkalar boıynsha qoldanylatyn ózge de qarý túrlerinen oq atyp mashyqtanyp jatyrmyz. Osy oqý-ádistemelik jıyn barysynda úırengen, bilgenderimizdi óz batalondarymyzǵa oralǵan soń jeke quramǵa úıretemiz», dedi 6655 áskerı bóliminiń jedel maqsattaǵy 1 batalon komandıri kapıtan Seıitjan Qalbaı.
«О́zimizdiń kásibı deńgeıimizdi kóterý maqsatynda Ulttyq ulan bazasynda bar qarý-jaraq túrlerinen oq atý sheberlikterimizdi shyńdap jatyrmyz. Osy arqyly áskerimizdiń sapaly ári myqty bolýyna atsalysamyz. Jıyn barysynda biz úshin eshqandaı qıyndyq týyndaǵan joq. Barlyq qarý túrlerin batalon komandırleri sheber ıgerip, qabiletterin arttyrdy», dedi 5571 áskerı bóliminiń 4 jedel maqsattaǵy batalonynyń komandıri maıor Tólebı Berikbaev.
Aıta keteıik, komandırler erteń jaýyngerlik tehnıkadan atý boıynsha praktıkalyq sabaqqa qatysady. Al 15 qyrkúıekte jıyn qorytyndylanyp, Úzdik ofıserler Ishki ister mınıstriniń orynbasary – Ulttyq ulannyń Bas qolbasshysy general-leıtenant Erkin Botaqanovtyń atynan gramotalarmen jáne baǵaly syılyqtarmen marapattalady.
