US open dodasynyń jartylaı fınalynda jeńilis tapqan álemniń birinshi raketkasy Karlos Alkaras óz ornyn Novak Djokovıchke bosatty. Qorjynynda 8535 upaıy bar 20 jastaǵy Ispanııanyń asqan daryn ıesi qazirgi kezde ekinshi oryndy enshileýde. Atalǵan týrnırde top jarǵan Serbııanyń sańlaǵy oljalaǵan upaılar sanyn 11795-ke jetkizip, qaıta óz tuǵyryna qondy. Dúbirli dodanyń fınalyna deıin jetken Danııl Medvedev úzdik úshtikti túıindedi. Reseıdiń ókili 7280 upaı ıelenip otyr. Sondaı-aq TOP-10 oıynshynyń qataryna Holger Rýne (Danııa, 4710 upaı), Stefanos Sısıpas (Grekııa, 4615), Andreı Rýblev (Reseı, 4515), Iаnnık Sınner (Italııa, 4465), Teılor Frıts (AQSh, 3955), Kasper Rýýd (Norvegııa, 3560) jáne Aleksandr Zverev (Germanııa, 3030) endi.
Qazaqstannyń tennısshileri arasyndaǵy eń úzdik kórsetkish Aleksandr Býblıkke (1349 upaı) tıesili. 26 jastaǵy jerlesimiz ATR reıtınginde 29-orynda tur. О́zge oıynshylarymyz mynadaı satylarǵa jaıǵasty: Tımofeı Skatov (498) – 123-oryn, Mıhaıl Kýkýshkın (250) – 244, Denıs Evseev (229) – 261, Beıbit Juqaev (186) – 283, Dmıtrıı Popko (103) – 434 jáne Grıgorıı Lomakın (29) – 811.
Osy kúnge deıin áıelderdiń básekesinde aldyna jan salmaı kelgen Iga Sventek (8185) AQSh-tyń ashyq birinshiliginiń tórtinshi kezeńinde súrindi. Sonyń saldarynan 22 jastaǵy Polshanyń ókili bir saty tómen syrǵydy. Onyń ornyn Arına Sobolenko (9266) basty. 25 jastaǵy Belarýstyń betkeustary Nıý-Iorkte fınalda utylǵanyna qaramastan, búgingi tańda álemniń birinshi raketkasy atanyp otyr. Al Nıý-Iorktegi dúbirli dodada bas júldeni oljalaǵan Korı Gaýff (6165) úzdikter tiziminde úshinshi orynǵa kóterildi. Jalpy, 19 jastaǵy AQSh tennısshisiniń bul tabysyna tańdanýǵa bolmas. Ol ýaqyt ozǵan saıyn dara talantymen oqshaýlanýda. Byltyr Gaýff Rolan Garrostyń aqtyq synyna deıin alqynbaı jetip, sheshýshi tusta Iga Sventekke jol berdi. Bıyl «Úlken dýlyǵa» sanatyndaǵy týrnırde tuńǵysh ret top jardy.
Qazaqstannyń birinshi raketkasy Elena Rybakına (5665) US open týrnırindegi sátsizdikten keıin bir saty tómendep, qazirgi kezde besinshi oryndy qanaǵat tutýda. Tórtinshi orynǵa amerıkalyq Djessıka Pegýla (5755) kóterildi. Nıý-Iorkte Elena úshinshi aınalymda jeńilistiń kermek dámin tatsa, Djessıka tórtinshi kezeńge deıin jetti. Sondaı-aq úzdikter tiziminde Marketa Vondroýshova (Chehııa, 3830), Ons Jaber (Týnıs, 3772), Karolına Mýhova (Chehııa, 3765), Marııa Sakkarı (Grekııa, 3525) jáne Medıson Kız (AQSh, 2940) bar.
Elena Rybakınadan bólek, Qazaqstannyń ózge tennısshileri qazirgi kezde mynadaı oryndardy ıemdenýde: Iýlııa Pýtınseva (767) – 83-oryn, Jibek Qulambaeva (101) – 492-oryn, Gozal Aınıtdınova (62) – 621 jáne Anna Danılına (25) – 864.
Juptyq saıystarda da kóshbasshylar ózgerdi. Erler arasynda ulybrıtanııalyq Nıl Skýpskıdi (6950) amerıkalyq Ostın Kraıchek (7750) pen horvatııalyq Ivan Dodıg (7240) jyly ornynan yǵystyrdy. Tórtinshi jáne besinshi oryndardy nıderlandtyq Ýeslı Koolhof (6800) pen AQSh-tyń taǵy bir ókili Radjıv Ram (5597) ózara bólisýde. Bizdiń Aleksandr Nedovesov 46-satyǵa turaqtady. Áıelder arasynda Amerıkanyń qos juldyzy – Djessıka Pegýla (6035) men Korı Gaýff (6035) ıyq tiresip tur. Ekeýiniń de jıǵan upaılary birdeı. Olardy belgııalyq Elıza Mertens (5975), chehııalyq Katerına Sınıakova (5625) jáne aýstralııalyq Storm Hanter (5490) ókshelep keledi. Qazaqstannyń ókili Anna Danılına 32-oryndy ıelenýde.
