Túz janýarlary alqapta 5-10 myńdap órip júrgenin kózimiz kórdi. Jalǵyz adamnyń qolynan eshteńe kelmeıdi, 10 shaqty sharýa qojalyǵy birigip, arnaıy chat ashyp, ózimiz kúzettik. Egistikke kıik kirse, qaı jerde júrgenin, qaıda bet alyp bara jatqanyn foto-vıdeoǵa túsirip, chatqa salyp otyrdyq. Kúndiz-túni kıik qýýmen boldyq. Ákimdikke de, «Ohotzoopromǵa» da habarlastyq. Endi ol kisiler kúnde shapqylaı bermeıdi. Kıik jaıpap ketken jerdi fıtosanıtarııa ókilderi de kelip, ózderine tirkep aldy. Kıik egindi balǵyn kezinde jeıdi. Biraq kóbine jegeninen, taptap ketkeni kóp. Jumsaq bolǵan soń aýnap, basyp tastaıdy. Bizdiń 800 gektar eginimizdiń 200 gektary shyǵynǵa ushyrady. Moınymyzda bankten alǵan qaryzymyz bar, ony qalaı óteıtinimizdi bilmeımiz. Buryn osyndaıdy baqylap, qarap júretin qaraýyl bolatyn. Qazir bári jekemenshik bolǵandyqtan, ol jumystardy ózimiz atqaramyz. Tájirıbemizde mundaı oqıǵa kezdespegen. Kıiktiń tóldep keletin baǵyty Torǵaıdan bastalyp, óziniń aýanymen Qorǵaljyń aýmaǵyna ótip ketetin. Bir jaǵy jańa temirjol salǵannan keıin óte almaı jatyr ma dep oılaımyz.
Endi kúnniń ystyǵynan, shegirtkeniń jegeninen, kıiktiń taptaǵanynan qalǵan eginimizdi jınap alýǵa tolassyz jaýǵan jaýyn kedergi bolyp tur. Eginimiz shirip, ysyrap bola ma dep qaýiptenemiz. Úkimetten kómek bolmasa, sińirine ilingen sharýa qojalyqtaryna jabylyp qalý qaýpi tónip tur. Bárimizdiń de Úkimet tarapynan beriletin nesıeniń demeýimen jumys júrgizip jatqanymyz shyndyq.
Búginde Torǵaı dalasynda 90 myńnan asa kıik bar degen málimet bar. Aqbókenderdiń deni Aqshyǵanaq, Aqkól, Saǵa aýyldaryna tıesili jerlerdi mekendeıdi. El basynda otyrǵan azamattar da bizdiń jaǵdaıymyzdy kóri-bilip otyrǵan shyǵar. Sondyqtan bul máseleniń bir sheshimi bolar degen úmitimiz bar.
Erden SEIITJANOV,
«Seıtjanov JK» sharýa qojalyǵynyń basshysy
Arqalyq qalasy
