ULTTYQ KÚNNIŃ ULAǴATY

О́tken senbide, “EKSPO – Shanhaı-2010” Dúnıejúzilik kórmesinde Qazaqstan Respýblıkasynyń Ulttyq kúnin ótkizýdiń saltanatty rásimi boldy. Onyń ashylýyna Aýyl sharýashylyǵy mınıstri, Qazaqstan delegasııasynyń basshysy A.Kúrishbaev pen Qytaı Halyq Respýblıkasy Kommersııalar jónindegi mınıstriniń kómekshisi Choý Hong qatysyp, qysqasha sóz sóıledi.

Qaısar ÁLIM  – Shanhaıdan.

Osynyń aldynda ǵana elimizdiń Týyn EKSPO aýmaǵynyń kire­be­ri­sindegi jalaýlar jelkeninen nemese Hýanpý ózeniniń boıymen qa­tarlasa júzip, ár memlekettiń qas­terli nyshanyn otshashý astyn­da sánimen alyp ótken kishkene qaıyqtardyń qyr jelkesinen kó­rip, syrt jerden óz elmizdiń múıisin tapqandaı shattanǵanbyz. Endi, mine, kórmede Ulttyq kún atalyp ótýine baılanysty mem­le­ket­tik Tý saltanatty túrde resmı kóterilip, Ánuran oryndaldy. Bul sharaǵa Qazaqstan, Qytaı delega­sııa­lary, birqatar memlekettiń dıplomatııalyq ókilderi, EKSPO ult­tyq pavılondarynyń jetek­shi­leri, qala jurtshylyǵy qatysty. О́z sózinde A.Kúrishbaev Qazaq­stan­nyń mundaı iri kórmelerge 2000 jyldan bastap qatysyp júr­genin, bul úshinshi báseke, synaq ekenin málimdedi. Kúnine 5 myńǵa jýyq adam kelip, tamashalaıdy. Olar 1,5 myń sharshy metrge qa­zaqstandyq qurylysshylardyń kúshimen turǵyzylǵan pavılonda, ozyq tehnologııalar kómegimen jalpy Qazaqstan, onyń iri qala­lary týraly tolyq málimetterge qa­nyǵady. Mádenıeti, salt-dás­tú­ri, ekologııasy alaqandaǵydaı ashy­lady. Elimizdiń 30-dan astam shyǵarmashylyq ujymy jarty jyl boıyna kelýshilerge kon­serttik baǵdarlamalaryn usynady. Odan ári delegasııa basshysy qytaılyqtardyń osy kórmedegi Qazaqstan pavılonyna týǵyzyp otyrǵan qamqorlyǵyna rızalyq bildirdi. 2017 jyly EKSPO kór­mesin Astanada ótkizýge bizdiń el tarapynan da aldyn ala ótinish túsirilipti. Árıne bul usynysty Qytaıdyń qoldaıtynyna úmit zor. EQYU-ǵa sátti tóraǵalyq etip otyrǵan Qazaqstanda 2011 jyly VII Qysqy Azııa oıyndary ótki­zilmekshi. Bul jaǵy da eskerilip, senimdilik týǵyzary haq. Mınıstrdiń aıtýynsha, Qa­zaq­stan­nyń Qytaı Halyq Respýb­lı­kasymen ekonomıkalyq qarym-qatynasy nyǵaıyp keledi. Bıyl biraz mólsherde astyq eksport­tal­dy. Ústimizdegi jyly taýar aına­lymy mólsheri 10 mıllıard dol­larǵa jetpek. Qazirdiń ózinde bul mejeniń jartysy alyndy. О́z kezeginde QHR Kommer­sııalar jónindegi mınıstriniń kómekshisi Choý Hong bul kórmeden qaryshty damý ústindegi Qazaqstan týraly jan-jaqty málimetter alý­ǵa bolatynyn, eki el arasyndaǵy tyǵyz yntymaqtastyqtyń nátı­je­si ilgerilep, bıyl aýyl sharýa­shy­ly­ǵy, ónerkásip, kólik, mádenı salada 14 mıllıard dollarǵa jýyq ózara kelisimderge qol qoıyl­ǵa­nyn málimdep, Shanhaı úlgisin­de­gi shahar jetistikterin sıpattady. Qos memleket delegasııasy Qa­zaqstannyń, Qytaıdyń, Reseıdiń, О́zbekstannyń, t.b. elderdiń ult­tyq pavılondaryn aralap kórdi. Qonaqtardy Qazaqstan pavılo­ny­nyń bas komıssary A.Qazybaev pen dırektory R.Dilmaǵambetova ertip júrdi. “EKSPO-2010” aımaǵynyń birneshe núktesinde jáne keshkisin EKSPO ortalyǵynda Qazaqstan­dyq óner sheberleriniń konserti boldy. Ulttyq kúnniń ulaǵaty osy­laısha zor áserge bóledi. Jal­py, elimiz kórmeshileriniń jarqyn jetistigi jóninde túıin jarııa­la­nymdy gazetimizdiń aldaǵy san­darynan oqı alasyzdar.