Ulttyq memlekettik Kitap palatasynyń statıstıkasyn keltirsek, 2022 jyly Qazaqstanda kitaptar men broshıýralardyń 4 044 ataýy tirkelgen. Eń kóp kitap pen broshıýra Almaty, Almaty oblystarynda jaryq kórgen: 1 749 kitap pen broshıýra tirkelgen. Elimizdegi kitaptardyń basym bóligi pedagogıka salasynda (ádistemelik quraldar, kitaptar) jaryq kórdi. Kitaptar sany – 1085. Kórkem ádebıet janry boıynsha: qazaq ádebıeti – 664, poezııa – 166, drama – 3, proza – 286.
Baurzhan foundation qorynyń quryltaıshysy, kitap festıvaliniń alǵashqy uıymdastyrýshysy Juldyz Omarbektiń aıtýynsha, Kitap Fest – shyǵarmashylyqpen shuǵyldanatyn daryndy adamdarǵa arnalǵan biregeı alań. Bıyl qala kúnimen tuspa-tus kelgen Kitap Fest Almaty festıvali «Ulttyq ádebıet. Ulttyq til. Ulttyq dástúrler» atty taqyrypty arqaý etti.
«9 jyl ishinde Kitap Fest almatylyqtardyń eń súıikti is-sharasyna aınaldy. Elorda kúnine oraı shilde aıynda kitap festıvalin Astana qalasynda ekinshi ret ótkizgen edik. Oqý mádenıetin ilgeriletýge arnalǵan bizdiń festıval, jazýshylar men oqyrmandar úshin biryńǵaı alań quryp, balalar men jastardyń kitapqa degen qyzyǵýshylyǵyn arttyrýdy kózdeıdi. Kitap festıvali otandyq jazýshylarmen kezdesýlerden bastap, balalarǵa arnalǵan tanymdyq sheberlik sabaqtaryna deıingi ınteraktıvti ortany biriktiredi. Biz kópshilikti oqýǵa tartý, kitaptyń, mádenıet pen bilimniń mańyzyn arttyrý, jazýshylar men ádebı shyǵarmalardy nasıhattaýǵa járdemdesý úshin jumys istep jatyrmyz», dedi Kitap Fest kitap festıvaliniń bas úılestirýshisi Maıra Áljanova.
Almaty kitap festıvali otandyq jazýshylardyń jańa kitaptaryn tanystyryp, kitapsúıer qaýym úshin aýqymdy baǵdarlama daıyndady. «Offlaın kitaptar týraly» shatyrynda tanymal jazýshylar, qoǵam qaıratkerleri men blogerler pikir almasty. Almatylyqtarǵa ıllıýstrasııalanǵan kitap kórmesi, sheberlik synyptary, túrli baıqaý men aksııa, elimizdiń iri baspalary men kitap dúkenderiniń jármeńkesi usynyldy. Baspagerler jáne kitap dúkenderi óz ónimderin kórmede 30%-ǵa deıingi jeńildikpen satty. Bıylǵy jyly kitap festıvalinde 50-den asa kitap dúkenderi men baspalar óz ónimderin usyndy. 28 jańa kitaptyń tusaýy kesildi.
Festıvalde 40-qa jýyq pikir kóshbasshylary sóz sóıledi: Smaǵul Elýbaı, Dosym Sátbaev, Dildár Mamyrbaeva, Eldos Toqtarbaı, Beıbit Sarybaı, Abylaı Iýsýpov, basqa da kóptegen tanymal ádebı tulǵa qazirgi ádebıettegi úrdis týraly sóz qozǵady. Sondaı-aq «Meniń alǵashqy ertegilerim», «Tarmaqtar», basqa da jańa kitaptardyń tusaýkeseri ótti.
Belgili saıasattanýshy, pýblısıst, baspager Dosym Sátbaev Pavel Koktyshev jáne Álim Hamıtovpen birge «Kak osedlat edınoroga?» kitabynyń tusaýyn kesti. Onyń pikirinshe, onjyldyqta Kitap Fest shyǵarmashyl tulǵalar men kitapsúıer qaýym úshin bedeldi jáne qýatty alańǵa aınaldy.
Mundaı is-sharalardy ótkizý óte mańyzdy. Kitap oqıtyn adam sana kókjıegin keńeıtedi, logıkasyn, oılaýyn damytady, este saqtaý qabiletin jaqsartady. Osy rette Kitap Fest oqyrman qaýymdy biriktirip qana qoımaı, jańa múmkindikterge jol ashyp júr», dedi saıasattanýshy.
Sonymen qatar festıval qonaqtary ákelingen kitaptarmen almasýǵa, unaǵan kitaptardy jeńildikpen satyp alýǵa nemese olardy tolyǵymen tegin alýǵa múmkindik aldy. Bıylǵy kitap festıvalinde ártúrli janrdaǵy 5000 kitap tegin taratyldy.
Balalarǵa arnalǵan oıyn-saýyq baǵdarlamasynda anımatorlar, akvagrım men túrli qyzyqty baıqaý men vıktorına kelgen qonaqtarǵa tamasha kóńil-kúı syılady. Dástúr boıynsha festıvalde «Aýylǵa kitap» aksııasy ótkizildi, onda kez kelgen oqyrman óz úıiniń sóresinen kitap ákelip, aýyl kitaphanalaryna tapsyrýǵa atsalysty. Bıylǵy festıvalde 3 myńǵa tarta kitap jınaldy.
ALMATY
