Bir aıta keterligi, dál osy oqý ordasy oqý baǵdarlamasy bastalmas buryn 1-synypqa endi qabyldanǵan balalardyń basyn qosyp, ashyq sabaq ótkizdi. Astana qalasy Ádistemelik ortalyǵynyń uıymdastyrýymen «Ata zańym – eldigimniń belgisi» taqyrybynda ótken sabaq Qazaqstan Respýblıkasynyń Prezıdent ortalyǵynda uıymdastyryldy.
Sabaq kezinde oqý ordasynyń tabaldyryǵyn alǵash attaǵan búldirshinder «Táýelsizdik el uranyn» hormen oryndap, «О́rnekter» bıin bılep, «Alǵashqy qońyraý», «Aıaýly mektebim», «Oqýda ozat bolamyn» ánderin shyrqady. Balalar elimizdiń rámizderi týraly suraqtarǵa irkilmeı jaýap berip, Ata Zań týraly óleńderin jatqa oqyp, basty zań qujatynda jazylǵan quqyqtaryn biletinderin kórsetti. Aqıyq aqyn Muqaǵalıdyń «Úsh baqytym», «Otan» óleńderin naqyshyna keltirip oqyǵan ul-qyzdar elimizdiń Ánuranyn da tebirene oryndady. Ashyq sabaqqa qatysqan bilim salasynyń qyzmetkerleri, qala mektepteriniń pedagogteri men ata-analar bilim álemine endi ǵana bettegen búldirshinderdiń mektepke daıyndyǵy joǵary ekenin aıtyp, rızashylyqtaryn bildirdi. Prezıdent ortalyǵynyń basshysy Botagóz Qaıypova mektep dırektory men muǵalimderge jańa oqý jylynda sáttilik tilep, alǵys hattar tapsyrdy. Sondaı-aq oqýǵa beıimdi, ónerli búldirshinderdi jańa oqý jylymen quttyqtap, syılyqtar usynyp, oqýda ozat bolýlaryn tiledi.
Bastaýysh synyp muǵalimi Qalamqas Ahmetqalıeva mektepten tys uıymdastyrylatyn mundaı sabaqtar balalardyń úlken ortaǵa tez beıimdelip, oılaryn irkilmeı ashyq jetkizýlerine septigin tıgizetinin aıtady. «Bizdiń basty maqsatymyz – oqýshylardyń bilimge degen qushtarlyǵyn arttyrý, elimizdiń bilimdi, tárbıeli azamatyn eljandyqqa tárbıeleý. El tutqasyn ustar ár jasty Ata Zańymyzǵa qurmetpen qaraýǵa, fýnksıonaldy saýattylyqqa úıretý», deıdi Q.Ahmetqalıeva.
Sabaq barysynda balalar Astana qalasynyń eń ádemi jerleri men tynys-tirshiligi týraly prezentasııamen tanysty. Sondaı-aq sabaq kezinde 11-synyp oqýshylary búldirshinderge Álippe oqýlyǵyn saltanatty túrde tabystady. 1-synyp oqýshylary jınalǵan jurttyń aldynda bul oqýlyqty, kirletpeı, jyrtpaı, uqypty ustaýǵa jáne aǵa-ápkeleri sekildi úlgili, ozat oqýshy bolýǵa ýáde berdi.
Ashyq sabaq sońynda alǵashqy qońyraý da soǵyldy. Qońyraýdy kúmbirlete soǵý qurmetine qalalyq, respýblıkalyq olımpıadalardyń júldegeri, lıseıdiń bıylǵy túlegi Álıhan Marat men mektep tabaldyryǵyn alǵash attaǵan Aqkerbez Jalǵas ıe boldy.
