Kóshpeliler saltynda alys joryqqa shyqqan attylardyń asar aty, qosar aty degen bolatyny tarıhtan belgili. Asar at jolda azyq qylýǵa arnalsa, al qosar atty qosalqy at deýge bolady. Búgingi «Uly dala joryǵy» marafonynda bul salttar da eskerýsiz qalǵan joq. Tebingisine ter qatqan attylar orta jolda tyń atqa minip, saparyn odan ármen jalǵastyrdy. Ázirge basyp ótken joldyń uzaqtyǵy 850 shaqyrymnan asady. 14 qyrkúıekte «Uly dala joryǵy» marafon-báıgesiniń 9-kezeńi bastaldy. Elordadan attanǵan 19 komandanyń 12-si jolda, ózgesi jarys jolynan shyǵyp qaldy.
«Endi komandalar joldan shyǵyp qalady degen qaýip azaıdy. О́ıtkeni shabandozdar at aýystyryp mindi. Ýaqytyn utymdy paıdalanyp, Túrkistanǵa jetedi degen senimdemiz. Byltyr 600 shaqyrymdy 9 komanda 32 atpen ótse, bıyl 650 shaqyrymdy 12 komanda 41 atpen alǵashqy kezeńdi aıaqtap otyr. Byltyr 650 shaqyrymdy birinshi bolyp baǵyndyrǵan komandanyń ýaqyty shamamen 56 saǵatty qurasa, bıyl 42 saǵatta júrip ótti. Bul attardyń daıyndyǵyn kórsetedi. Ekinshiden, básekeniń óte joǵary deńgeıde ekenin bildiredi. Sondaı-aq 1-kezeńniń 4 aty komandadan tys 1 300 shaqyrymdy baǵyndyrýǵa bekinip otyr. Onyń bári mal dárigeriniń ruqsatymen júzege asady», dedi «Joryq» at sporty federasııasynyń prezıdenti, joba avtory Baqytjan Turlybek.
Bas tóreshi Nadejda Kýpsovanyń aıtýynsha, komandalardyń jarystan shyǵyp qalýy olardyń daıyndyǵynyń azdyǵy men attardyń baby kelispegennen boldy.
«Veterınarlardyń keńesine qulaq túrgender jarysty áli jalǵastyryp keledi. Ázirge Mańǵystaý, Jetisý, Qostanaı qurama komandalary attaryna óte jaqsy mán berýde. Byltyr joryqqa qatysa almaı qalǵan Qostanaı oblysy komandasy bárimizdi tánti etti. Mal dárigerleriniń pikirinshe, 650 shaqyrymdy baǵyndyrǵan attar qatarynda qostanaılyq shabandozdar kásibıligimen, tulparlarynyń myqtylyǵymen qatty erekshelenedi.
Degenmen kimniń jeńiske jetýi múmkin ekenin aıta almaımyn. Qalǵan jerdi tyń attarmen bastadyq. Attardyń qalaı beıimdeletinin baqylaýymyz kerek. Ári ońtústik óńirge jaqyndaǵan saıyn aýa raıy jyly keledi», deıdi N.Kýpsova.
Uıymdastyrýshylardyń aıtýynsha, alda 5 kezeń, ıaǵnı 450 shaqyrym qaldy. Buǵan áli at aýystyrmaı kele jatqandar da bar.
«Astana qalasy, Mańǵystaý, Jetisý, Qostanaı oblystarynyń shabandozdary 650 shaqyrymdy júrip ótken tulparlarymen Túrkistanǵa deıingi 1 300 shaqyrymdy eńserýdi kózdep otyr. Bul tórttikke tóreshiler «Rekord» degen ataý berip, arnaıy 13-komanda retinde tirkep, nátıjelerin kúndelikti baqylap otyr. «Rekord» komandasynyń jigitteri dittegen maqsatyna jetse, kelesi jylǵy joryqqa Gınnestiń rekordtar kitabynyń ókilderin shaqyrtý josparda bar. 1 300 shaqyrymdy bir atpen az ýaqytta baǵyndyrǵan azamattar men qazanattardyń nátıjesi rekordtar kitabyna buryn-sońdy bolmaǵan erekshe nátıje retinde engizýge suranyp tur», deıdi tóreshiler.
Aıta keteıik, «Uly dala joryǵy» respýblıkalyq marafon-báıgesiniń bas seriktesi – «Sport Qory» týrızm ındýstrııasy men sportty qoldaý qory.
