ELORDAǴA ARNALǴAN JYR KEShI

Astanadaǵy Kongress-holl sa­raı­ynda halyqaralyq “Alash” syı­lyǵynyń laýreaty, aqyn Se­rik Turǵynbekulynyń “Aspan­nyń asty – Astana” atty shyǵar­ma­shylyq keshi ótti. Keń saraıdyń túndigin aqyn­nyń dostary men shyǵarmashylyq jolyndaǵy áriptesteri shyrqaǵan ánder jelpildetip jibergendeı. Avtory Serik Turǵynbekuly bolyp tabylatyn 20-dan astam ánderdiń qaı-qaısysy da keshke jınalǵan qaýymnyń rızashylyǵyna bólendi. Birinen soń biri shyrqalǵan ánder astanalyqtardyń qulaq quryshyn qandyrdy. Aldymen Astana qa­la­lyq memlekettik fılarmo­nııa­sy­nyń ult as­paptar orkestri oryn­da­ǵan Nur­ǵısa Tilendıevtiń “Álqıs­sa” kúıi­niń súıemeldeýimen sahna tórine shyqqan Serik Turǵyn­bek­uly óziniń “Álqıssa” dep atalatyn jyr shýma­ǵyn oqydy. Osydan keı­in aqyndy shyǵarmashylyq ke­shi­men quttyq­taýǵa kelgen Qazaq­stan­nyń halyq ár­tisi Nurǵalı Nú­sip­janov “Aqkól­den ushqan aqqýlar”, al Qazaq­stan­nyń halyq ártisi Eskendir Hasan­ǵa­lıev uly Bir­jan­men birge aqyn­nyń sózine jazylǵan “Qutty bol­syn, týǵan kúniń!”, “Aq perishte” án­derin shyrqady. Son­daı-aq bel­gili ánshiler Marat Omarov, Gúlzıra Bókeı­han­qyzy arnaıy kelip, óz ónerlerimen jurt­shylyqty tánti etti. Sondaı-aq, shyǵarmashylyq kesh­te basqa da ánshilerdiń oryndaý­ynda “Er­ke qyz”, “Sulýym”, “Er Jáni­bek”, “As­­tana – arý, Astana” án­de­ri shyr­qalyp, “Keıki batyr” já­ne “Sá­­ken suńqar” dastan­da­ry­nan úzindi oqy­lyp, tyńdarmandar yqy­lasyna bólendi. Torǵaı oblysy, Jangeldın aý­dany, Tosyn qumynda dúnıege kel­gen aqyn qazaq rýhanııatyna mol olja saldy dese de bolady. Onyń “Muqaǵalı” dramasy osy kúnge deıin sahnadan túspeı kele jatsa, “Abaı-Birjan” dep atalatyn mýzy­kalyq dramasy sońǵy eki jyldan beri Semeı teatrynda úzilissiz qoıylyp kele jatýy bul sózimizdiń tolyq aıǵaǵy desek, “Keıki batyr” jáne “Sákenniń sońǵy kóktemi” dramalary teatr sahnalarynda óz kezegin kútip jatqan kórinedi. Sońǵy jyldary aqynnyń “Asan ata izimen”, “Jerorta” atty kitap­tary da jaryq kóripti. О́z keshin “Aspannyń asty – As­tana” dep ataǵan aqyn onyń syryn memleketimizdiń elordasy – barsha qazaqtyń maqtanyshy, kele­shek ur­paqtyń qalasy ekendigimen túsin­dirgen. О́z sán-saltanatymen, joǵary deńgeıde ótken keshten tyńdarmandar úılerine rızashy­lyqpen qaıtty. Venera TÚGELBAI.