Lotos Reseımen shektesip jatqan Qurmanǵazy aýdanynda, Qıǵash jáne Sharonovka ózeni arnasynyń dáp Kaspıı teńizine quıar saǵasynda gúldeıdi. Qıǵash – Edilden shyqqan ózen. Uzyndyǵy –100 shaqyrymǵa jeteǵabyl. Bálkim, Edil ózeniniń tarmaǵy bolǵan soń shyǵar, onda ósimdikterdiń, qustardyń, sý jándikteriniń túri kóp. Munda «Qyzyl kitapqa» engen qustardyń 36 túri bar eken. Al biz aıtyp otyrǵan ósimdiktiń gúli, ıaǵnı kúlteleri ǵana kól betinde qalqyp shyǵady.
Býdda iliminde lotos tazalyqtyń, jaryqtyń belgisi sanalady eken. Al qazaq halqy lotosty «shamgúl» dep ataǵan. Rasynda da, mı batpaqtyń arasynda ósken lotos tirshilik ataýlyny quddy bir ózine qaratyp, nuryn shashyp turatyndaı. Shamgúldiń Kaspıı mańyna qaıdan kelip, qalaı jersinip ketkeni jaıynda boljamdar jeterlik. Sonyń ishinde negizgi nusqalardyń birine súıensek, lotos Uly Jibek joly arqyly Úndistan men Qytaıdan kelipti. Jergilikti saýdagerler sapar barysynda buryn-sońdy kórmegen gúlge tamsanyp, tuqymyn ala kelgen. Tuqymyn alyp kelgennen bólek, lotos gúliniń qazaq dalasyna jersinýiniń ózi – tańǵalarlyq qubylys.
Reti kelgende lotos gúlin tamashalaýǵa qalaı barýǵa bolatynyn aıtalyq. Kóligi barlar belgilengen aımaqqa Atyraý-Astrahan tasjolymen jete alady. Nemese týrıstik fırma uıymdastyrýymen ótetin «Lotos gýldeýi» eko-týryna qatysýǵa bolady. Tek qaı baǵytpen barsańyz da, Qıǵash ózeniniń salasyna deıin 300 shaqyrym, ary qaraı lotos alqabyna taǵy birneshe shaqyrym qaıyqpen júzip ótýge týra keledi. Saparǵa shyqqandar Ganıýshkıno aýylynyń mańyndaǵy demalys oryndarynyń birin tańdap, aýmaqtyń kórikti jerlerin alańsyz aralasa bolady.
