Tamyzdyń sońǵy onkúndigindegi úzilissiz jaýyn 51,9 mm bolyp normadan 108 paıyzǵa asqan. Al qyrkúıektiń alǵashqy dekadasyndaǵy jańbyr normadan 54 paıyzǵa kóterilgen.
Astyq jınaýǵa barlyq múmkindik bar edi, ol týraly «Egemenge» tolyq jazǵan bolatynbyz. («Egemen Qazaqstan», 04.09.2023 jyl). Jalǵyz kóńil kótererlik jaıt, qazir astyqtyń satyp alý baǵasy kóterilip, 95 AQSh dollary deńgeıine jetip otyr.
Oblystyq máslıhattyń sessııasynda depýtattar aldynda sóılegen sózinde oblys ákiminiń birinshi orynbasary «Úsh aptadan beri aýa raıynyń qolaısyzdyǵy bizge oraq naýqanyn júrgizýge kedergi bolyp tur. Ashyq bolǵan sońǵy kúnderde ǵana dıqandar jıyn-terimge qaýyrt kiristi. Alaıda astyqtyń sapasy ylǵaldyń artýynan nasharlaýda. Osyǵan baılanysty Aýyl sharýashylyǵy mınıstrliginiń aldyna naqty máseleler qoıdyq. Qazirgi, ylǵaldylyǵy 20 paıyz astyqty qurǵatyp, eń bolmasa 14-15 paıyzǵa jetkizýimiz kerek. Ol úshin jeńildetilgen baǵamen qosymsha JJM-nyń (janar-jaǵar maı) jańa kólemi bosatylýy kerek. Bulardy astyq qabyldaý pýnktteri, qyrmandar men elevatorlar qoldanyp, astyqty qurǵatý jumystaryna jumsaıdy», dedi ol.
Jeńildetilgen baǵa degenimiz – JJM-nyń lıtrin 250 teńgeden bosatý degen sóz. Osyǵan deıin oraq naýqanyna osy baǵamen JJM jetkilikti kólemde bosatylǵan. Endi astyqty qurǵatý jumystaryna da osy baǵamen JJM bosatýdy suraǵan ótinish mınıstrlikke attandyrylypty. Sonymen qatar astyq qabyldaýdyń sapalyq normasyn ózgertý de usynylǵan. Burynǵy qatań norma sál jumsartylmasa, dıqannyń eńbegi esh bolýy múmkin. Al «QazAgroQarjy» jáne Azyq-túlik korporasııasynan qosymsha sýbsıdııalar suraýǵa ótinish berilgen. Satyp alý baǵasy da qaıta qarastyryp, dıqannyń eńbegin aqtaýdy eskerý suralǵan.
Aqqaıyń aýdanyndaǵy «Astrahan» JShS – oblystaǵy úlken aýylsharýashylyq kásiporyndarynyń biri. Olar jyl saıyn 7 myń gektar jerge astyq egedi. Sharýashylyq dırektory Janarhan Makenovtiń aıtýyna qaraǵanda olardyń alqaptarynda bıyl da jaqsy astyq shyǵypty. Alaıda aýa raıy qolbaılaý bolyp, ósirilgen astyqtyń áli 20 paıyzdaıy jınalmaǵan eken. «Aldymen 10 kún boıy úzilissiz jańbyr jaýdy, sál tynystaǵan soń taǵy 5 kún boıy tolassyz jaýdy. Árbir jylt etken sátti kúndi paıdalanyp qalýǵa tyrysýdamyz. Jalpy astyq shyǵymdylyǵy jaman emes, úshinshi synyptan tómeni joq. Bárin de Azyq-túlik korporasııasyna ótkizýdemiz», dedi ol. Osy Aqqaıyń aýdanyndaǵy «Smırnov elevatory» – 100 myń tonnaǵa deıin astyq qabyldaı alatyn irgeli kásiporyn. Qazir oǵan 30 myń tonnadan artyq astyq túsipti. Kásiporyn dırektory Vladımır Nepýshkınniń aıtýyna qaraǵanda, kúnine 1 500-2 000 tonnadaı astyq qabyldap jatyr eken. «Túsip jatqan astyqtyń sapasy sonshalyq jaman dep aıtpaımyn. Ylǵaldylyǵy kóbirek ekeni ras, biraq keptirý jumystaryn atqaryp, úshinshi synypqa jetkizýge bolady», dedi ol.
Marat Tasmaǵambetov depýtattardyń aldynda sóılegen sózinde sınoptıkterdiń aldaǵy eki aptada kúnniń ashyq bolatynyn aıtqanyn jetkizip, osy ýaqytta astyqty tolyq jınap alarmyz degen úmit bildirdi.
Soltústik Qazaqstan oblysy
