Eń sońǵy mejede júırikterine qamshy basyp, alǵa ozyp shyqqan Jetisý oblysynyń komandasy jeńimpaz atanyp, bas júlde – 18 mln teńge kóleminde qarjylaı syılyqpen marapattalady. Al ekinshi oryn ıelengen Aqtóbe oblysynyń komandasy – 16 mln teńge, úshinshi oryn ıegeri Almaty qalasynyń komandasy – 9 mln teńgeni qanjyǵasyna baılady. Tóreshilerdiń sheshimimen, márege tórtinshi bolyp jetken Abaı oblysynyń komandasyna 5 mln teńge beriletin boldy.
On tórtinshi kúnniń qorytyndysy boıynsha, Jetisý oblysy – 93 saǵat 47 mınýt 43 sekýnd, Aqtóbe oblysy – 95 saǵat 06 mınýt 37 sekýnd, Almaty qalasy – 104 saǵat 23 mınýt 57 sekýnd, Abaı oblysy – 112 saǵat 12 mınýt 46 sekýndta márege jetti.
Sonymen qatar bul jolǵy joryqta Mańǵystaý oblysynyń 21 jastaǵy shabandozy Maǵjan Abdoluly «Shaǵyraıtory» degen atyn Gınnestiń rekordtar kitabyna engizýi múmkin. Ol 1 300 shaqyrymnyń sońǵy 50 shaqyrymyn baǵyndyrýǵa tańǵy saǵat 07:10-da attanyp, Túrkistandaǵy máre syzyǵyn 08 saǵat 44 mınýt 09 sekýndta birinshi bolyp kesti. Astanadan Túrkistanǵa deıingi 1 300 shaqyrymdy bastan-aıaq bir ǵana atpen eńserýdi maqsat etken «Rekord» komandasynyń quramy Astana qalasy, Mańǵystaý men Jetisý oblystarynyń shabandozdarynan quralǵan.
«Márege Jetisý shabandozy ekinshi bolyp kelse, artynsha Astana shabandozy jetip, «Rekord» komandasy dittegen maqsatyn oryndady. 1 300 shaqyrymdy 1 atpen baǵyndyrǵan azamattar 1-oryn úshin – 2,5 mln teńge, 2-orynǵa – 2 mln teńge, 3-orynǵa – 1,5 mln teńge kóleminde syıaqy aldy. «Rekord» komandasynyń nátıjesine toqtalsaq, Mańǵystaý oblysynyń jylqysy 1 300 shaqyrymdy 98 saǵat 44 mınýt 47 sekýndta baǵyndyrdy. Al Jetisý oblysynyń tulpary 100 saǵat 04 mınýt 34 sekýndta eńserdi. Úshinshi, astanalyq sáıgúliktiń ýaqyty 104 saǵat 28 mınýt 11 sekýndty quraıdy», deıdi uıymdastyrýshylar.
Olardyń aıtýynsha, komandasy jarystan shyǵyp qalsa da, joryqty óz erkimen jalǵastyryp, 1 300 shaqyrymdy jeke dara baǵyndyrǵan 10 shabandozdyń árqaısysyna tóreshilerdiń sheshimimen 1 mln teńge kólemindegi qarjylaı syılyq berildi.
Bul ǵana emes, eki aptalyq alamanǵa qatysyp, attyly shabandozdarmen birge 1 300 shaqyrymdy baǵyndyrǵan Beıneý aýdanynyń týmasy, Qazaqstannyń qurmetti qurylysshysy, elge belgili veloshabandoz Rabbım Borashovqa da tóreshiler «Eń úzdik jankúıer» nomınasııasyn belgilep, 1 mln teńge kóleminde qarjylaı syılyq taǵaıyndady. Aıta ketý kerek, Mańǵystaýdyń «Kókmoınaq» komandasyna jankúıer veloshabandoz buǵan deıingi marafon-báıgege qatysyp, Túrkistanǵa deıingi 1 200 shaqyrymdy baǵyndyrǵan edi.
Jalpy, 5-19 qyrkúıek aralyǵynda marafonshylar elordadan Túrkistan qalasyna deıin 1 300 shaqyrymnan asa qashyqtyqty basyp ótti. Marafon 14 satyǵa bólingen. Elimizdiń 19 óńirinen marafonǵa 1 komandadan qatysty. Marafonǵa qatysýshylarǵa Uly Dala rýhyn sezinýge jáne kıeli jerlerimiz – Joshy han, Alasha han keseneleri, túrki rýhanııatynyń besigi Túrkistan qalasy sııaqty tarıhı oryndarǵa zııarat jasaýǵa múmkindik týdy.
Marapattaý rásimi «Túrkistan-arena» stadıonynda ótti. «Uly dala joryǵy» respýblıkalyq marafon-báıgesiniń bas seriktesi – «Sport Qory» týrızm ındýstrııasy men sportty qoldaý qory.
