– Ermek Boranbaıuly, 2018 jyly Jakartada ótken Azııa oıyndarynda Qazaqstan quramasy beıresmı jalpykomandalyq esepte nebári 9-orynnan kórindi. Aldaǵy Azııa oıyndarynda qandaı maqsat qoıyp otyrsyzdar?
– Aldymen búgingi is-shara ótken Olımpıada daıarlaý ortalyǵy týraly aıta ketsem. 40 gektar jerge ornalasqan ortalyqta toǵyz sporttyq nysan bar. Sonyń altaýy paıdalanýǵa berilip otyr. Qalǵany Respýblıka kúnine oraı ashylady degen jospar bar. Atalǵan ortalyqta bir mezette 2300 sportshy jattyǵý ótkize alady. Endi sportshylarymyz úlken doda aldynda teńdesi joq ortalyqta alańsyz jattyǵa alady.
– Suraqqa naqty jaýap berseńiz?
– Suraǵyńyzǵa kelsek, árıne sportshylarymyz Azııa oıyndarynda ánuranymyzdy kóbirek shyrqatsa deımiz. 2018 jyly 75 medal, sonyń ishinde 15 altyn jeńip, úzdik ondyqtyń qatarynda bolǵanbyz. Árıne, bul nátıjege kóńilimiz tolmaıdy. Endi nátıjeni jaqsartyp, Jakartadaǵy kórsetkishten tómen bolmaýymyz kerek. Biraq sporttaǵy nátıjeni aldyn ala boljaý qıyn. Onyń ústine segiz sport túrinen Olımpıada lısenzııasy úlestiriledi. Sondyqtan barlyq sportshy mundaı múmkindikti jibergisi kelmeıdi. Bizdiń de sportshylar aıanyp qalmaıdy.
– Mınıstr retinde emes, qarapaıym jankúıer retinde qaı sportshynyń tileýin tileısiz?
– Naqty bir sportshyǵa jankúıer bolǵanym durys emes shyǵar. Biraq meniń bokstan álem chempıony Karına Ibragımovanyń bapkeri ekenimdi bilesizder. Bokstan erler quramasynan da, qyzdar quramasynan da bir-bir altynnan kútemiz.
Ámın TUIаQOV,
KSRO-nyń eńbek sińirgen sport sheberi:
– Balalarǵa batamdy berdim. Sportshylardyń janary jalyn shashyp tur. Azııa oıyndary – jaýapty dodanyń biri. Bul joly bizdi qýantatyndar kóp bolady-aý dep oılaımyn. Jolǵa shyqqaly turǵan sportshylardyń baǵy janyp, bıik tuǵyrdan kórine bersin. Qurama sapynda qarakózderimiz kóbeıipti, táýbe! Joldary oń bolyp, aman-esen baryp kelsin.
Ermahan YBYRAIYMOV,
Sıdneı Olımpıadasynyń jeńimpazy:
– Sońǵy Azııa jáne álem chempıonattarynyń nátıjelerine kóz júgirtsek, elimizdiń sportshylary Qytaı jerinde atoı salýy kerek. Beıresmı jalpykomandalyq esepte tórtinshi ne besinshi orynnan kórinýge tolyq múmkindigimiz bar. О́zime jaqyn boksty alatyn bolsaq, jigitterdiń barlyǵy saıdyń tasyndaı. Aslanbek Shymbergenov, Mahmut Sabyrhan, Sáken Bıbosynovtyń altyn alýǵa múmkindikteri joǵary.
Islam BAIRAMÝKOV,
Sıdneı Olımpıadasynyń kúmis júldegeri:
– Kúres túrlerinen Serbııada ótip jatqan álem chempıonatynda top jarǵan Rızabek Aıtmuhandy el gazeti arqyly quttyqtaǵym keledi. Osyndaı tarıhı jeńistiń Azııa oıyndary aldynda oryn alǵany tipten keremet boldy. Sebebi bul jeńis arqyly qazaqtyń balalary osal emestigin dáleldedi. Qytaıǵa attanǵan balýandardyń boıynda da senimdilik paıda bolady. Balýandarǵa tek sáttilik tileımin.
