Foto: Ashyq derekkóz
Saýalnama elimizdiń 17 oblysy men respýblıkalyq mańyzy bar qalalarynda júrgizildi. Oǵan qala jáne aýyldyq eldi mekenderde turatyn jasy 18-den asqan eki myń respondent qatysty. Turǵyndar kontent tutyný týraly 50 negizgi suraqqa jáne áleýmettik-demografııalyq sıpattaǵy 8 suraqqa jaýap berdi.
Áleýmettanýlyq zertteý nátıjesinde turǵyndar arasynda elimizdegi TOP-10 tanymal telearna anyqtaldy. Birinshi orynda «KTK» telearnasy, respondentterdiń 35,7%-y osy telearnany tańdaǵan. Ekinshi orynda «Eýrazııa birinshi arnasy» (34,7%). «Qazaqstan» telearnasyn 31,6% respondent tańdaǵan. Turǵyndar bul arnalardy negizinen jańalyqtar, sporttyq translıasııalar men serıaldar kórý úshin qosady.
Al tek qazaqtildi aýdıtorııa arasyndaǵy saýalnama nátıjesi boıynsha, «Qazaqstan» telearnasy birinshi orynda (41,5%), «KTK» (36,6%) arnasy ekinshi jáne «Eýrazııa birinshi arnasy» (36,3%) úshinshi orynda tur.
Respondentterdiń 56,1%-y «Qazaqstan» telearnasyn senimdi arna retinde ataǵan. Arnanyń eń tanymal jobalarynyń qataryna «Aqparat», «Apta», «Tańsholpan», «1001 tún», «Qyzyq eken» baǵdarlamalary endi.
Balalar kontentin tutyný boıynsha eń joǵary kórsetkish «Balapan» telearnasynyń úlesinde (36,4%). Sondaı-aq TOP-3 tanymal balalar arnasynyń qataryn «Nickelodeon RU» (10,4%) jáne «Mýlt» (9,2%) telearnalary tolyqtyrady.
Zertteý kezinde qazaqstandyqtardyń sporttyq translıasııalardy negizgi úsh arnadan izdeıtini anyqtaldy. Birinshi orynda «Qazsport» telearnasy (39,6%) , ekinshi orynda «Qazaqstan» (18,1%) jáne úshinshi orynda «Habar» (12,2%) arnasy.
Qazaqstandyqtardyń 59,6%-y aqparatty telearnalar arqyly alatynyn aıtqan. Tanymal kontent túrleri: jańalyqtar (61,7 %), serıaldar (41,2 %), saıası habarlar (24, 4%) jáne oıyn-saýyqtyq jobalar (22, 3%). Jańalyqtardy kórý boıynsha da úzdik úsh arnanyń qatarynda «KTK» (40,3%), «Eýrazııa birinshi arnasy» (37,5%) jáne «Qazaqstan» (36,3%) arnasy tur.
Jalpy, barlyq kórsetkishter boıynsha tanymal arnalar reıtıngisine joǵaryda atalǵan úsh telearnamen birge «NTK» jáne «31 arna» endi.
Al saýalnama nátıjesinde anyqtalǵan tanymal radıolardyń úshtiginde «Juldyz FM», «Rýsskoe radıo Azııa» jáne «Qazaq radıosy» bar.
