Báseke bási – nátıje

– Bizdiń mektepti Qazaqstan sportynyń qara shańyraǵy dep ataǵan jón, – dep bas­tady óz áńgimesin atalǵan mekemeniń dırektory Ernar Ybraıymov. – О́ıtkeni bul elimizdegi ǵana emes, álemdegi tuńǵysh salalyq oqý orny. Alǵash ret ol sport mektebi retinde ashylsa, keıinnen ınternat, odan keıin kolledjge aınaldy. Ýaqyt oza elimizdiń balamasy boıynsha keńes odaǵynyń ózge respýblıkalarynda osyndaı mekemeler birinen keıin biri boı kóterdi. Mine, joǵaryda aıtyp otyrǵan sózimniń naqty dáleli osy. Bizdiń basty mıssııamyz – deneshynyqtyrý jáne sport salasynda joǵary bilikti jáne básekege qabiletti mamandardy daıarlaý. Maqsatymyz – ár oqýshynyń ózindik erekshelikterin damyta otyryp, ózderi tańdaǵan sport túrimen aınalysýǵa barynsha qolaıly jaǵdaı jasap, sport túrleri boıynsha Qazaqstan Respýblıkasynyń qurama komandalary úshin sapaly olımpıadalyq rezerv daıarlaý. Kúni búginge deıin osy jospardy oıdaǵydaı júzege asyryp kelemiz. Osy oraıda mektep ujymyna qoldaý kórsetip otyrǵan Týrızm men sport mınıstrligi jáne sport komıtetine barynsha alǵysymdy bildiremin.

Qasıetti Áýlıeata óńiriniń túlegi Ernar Ybraıymovtyń ózi de kezinde erkin kúrespen kásibı túrde aınalysyp, biraz tabysqa qol jetkizdi. Sport­tyq mansabyn aıaqtaǵannan keıin Jam­byl oblysy men Almaty qalasynyń ákimdiginde qyzmet etti. 2011-2018 jyldar aralyǵynda óziniń týǵan ólkesine oralyp, Olımpıadalyq daıarlaý ortalyǵyn basqardy. Sol kezderi Tarazdyń talaı tastúlegi dúbirli dodalarda atoı saldy. Atalǵan ortalyqtan shyqqan Olımpııa oıyndarynyń eki dúrkin júldegeri, álem chempıony dzıýdoshy Eldos Smetov, Olımpıada men álem chempıonatynyń qola júldegeri, erkin kúres sheberi Aq­júrek Tańatarov, qazaqtyń dańqty túıe balýany Beıbit Ystybaev, ár jyldary halyqaralyq arenada tabysty óner kórsetken boksshylar Ǵanı Jaılaýov pen Ábilhan Amanqul, taekvondoshy Rýslan Ja­parov jáne taǵy basqa sportshylar Ernar Talasbekulynyń shapaǵatyn kóp kórdi.

– Jastar arasynda álem chempıo­ny atanǵannan keıin dzıýdoshy El­dos Smetovke qolaıly jaǵdaıdyń bar­lyǵyn jasadyq. О́ıtkeni jalyndap tur­ǵan jas órenniń bolashaǵy jarqyn eke­­nin ishteı sezdik. Kóp keshikpeı ol el senimin tolyqtaı aqtady. Jeke bap­keri Ǵalymjan Jylkeldıev ekeýi jat­paı-turmaı jattyǵyp, kózdegen maq­sattaryna qol jetkizý úshin kóp ter tókti. Shyny kerek, 60 kılo salmaq dáre­jesinde elishilik jarystardyń ózin­de básekelestik óte joǵary. Dál El­dostyń jarqyrap janyp kele jatqan tu­synda Erkebulan Qosaev pen Rústem Yby­raevtaı myqty qarsylastary boldy. Olar tatamımen qosh aıtysqannan keıin aldymenen Ǵusman men Ǵumar Qyr­ǵyzbaevtar, kóp keshikpeı Maǵjan Sham­shadın men Nurqanat Se­rikbaev shyqty. Olar Smetovtiń bir sátke de bo­sańsýyna múmkindik bermedi. Osyndaı bá­sekelestiktiń arqasynda Eldos sport­shy retinde qatty ósti, bıik-bıik bel­esterdi baǵyndyrdy. Búgingi tańda ol el maqtanyshyna aınalyp otyr. Sonyń barlyǵy qajyrly eńbek, janqııarlyq jáne ymyrasyz básekelestiktiń arqasy, – dedi E.Ybyraıymov.

2018-2022 jyldar aralyǵynda keıip­kerimiz Almatyǵa kelip, «Shańyraq» shaǵyn aýdanyndaǵy sporttaǵy daryndy balalarǵa arnalǵan mamandandyrylǵan mektep-ınternatty basqardy. Tórt jyldan asa ýaqyt aralyǵynda Ernar bul bilim oshaǵynyń mártebesin kóterýge barynsha kúsh saldy. Sol kezderi de «Shańyraqtan» birqatar myqty sportshy shyǵyp, olar respýblıkalyq jáne halyqaralyq jarystarda eleýli tabystarǵa qol jetkizdi.

Byltyrǵy jyldyń sońynda E.Ybra­ıymov Qarken Ahmetov atyndaǵy Olım­pıada rezerviniń respýblıkalyq ma­mandandyrylǵan mektep-ınternat-kol­ledjiniń dırektory bolyp ta­ǵaıyn­daldy. Qaı kezde de ózine júktelgen mindetke asa jaýapkershilikpen qaraıtyn isker basshy jumysqa birden bel she­she kiristi. Jas sportshylar men jat­tyqtyrýshylardyń muń-muqtajyn tyń­dap, aıtqan ýájderine qulaq asty. Mektep ujymymen birlese otyryp, qordalanǵan máselelerdi sheshý joldaryn qarastyrdy. Nátıje kóp kúttirgen joq. Bir jyldaı ýaqyt aralyǵynda kóptegen máseleler óz sheshimin taýyp, is órge basty. Bul kúnderi sol mekteptiń sportshylary esh alańsyz jat­tyǵyp, túrli oqý-jattyǵý jıyndary men ja­rystarǵa turaqty túrde qatysyp keledi.

Búgingi tańda atalǵan mektep-ınternat-kolledjde 505 bala oqıdy. Olar erkin kúres, grek-rım kúresi, semserlesý, boks, taekvondo, dzıýdo, sporttyq gımnastıka, sınhrondy júzý, bessaıys, júzý, sý doby, basketbol, voleıbol, velosport, eskek esý jáne kórkem gımnastıka sekildi sporttyń 16 túrimen shuǵyldanady. Solardyń qatarynda jasóspirimder men jastar arasyndaǵy jarystarda oza shaýyp júrgen tastúlekterdi aıtpaǵanda, ulttyq qurama sapynda óner kórsetip júrgen sportshylardyń da qarasy mol. Bul kúnderi taekvondoshy Rýslan Japarov, dzıýdoshy Bekarys Sádýaqas, semserlesýshi Bogdan Lýkın, erkin kúrestiń ókili Bekasyl Asanbek, sınhrondy júzýshi Edýard Kım, grek-rım kúresi sheberi Bekjan Ismaǵulov, veloshabandoz Alına Spırına, gımnasshy Anfısa Ivanova jáne vaterpolshylar komandasy halyqaralyq arenada Qazaq eli namysyn abyroımen qorǵap júr. Bir ǵana mysal, Qytaıdyń Hanchjoý qalasynda shymyldyǵy túriletin jazǵy Azııa oıyndarynda atalǵan mekteptiń 16 oqýshysy óner kórsetedi.

– Daryndy jastarǵa durys baǵyt-baǵdar berip, júıeli túrde jattyqtyryp, solardyń «sýyǵyna tońyp, ystyǵyna kúıip» júrgen bapkerlerdiń de eńbegin atap ótken abzal. Solardyń arasynan Vı­talıı Shtyhlın (velosport), Nur­ǵalı Rahmanqulov pen Altaı Tanabaev (er­kin kúres), Vılorıı Dıakonın (semserlesý), Jańabaı Ospanov pen Áset Iman­baev (grek-rım kúresi), Naılıa Baı­murzına (sınhrondy júzý), Sergeı Maslıýk (sý doby), Nurbek Myqtybekov (dzıýdo) jáne Elena Sınıavskaıa (eskek esý) syndy mamandardyń eńbegi zor. Olar­dyń barlyǵy da Qazaqstannyń eńbek sińir­gen jattyqtyrýshylary. Al ondaı maıtalmandardan tálim-tárbıe alǵan shákirt­terdiń osal bolýǵa qaqylary joq, – deıdi Ernar Talasbekuly.

Taǵy bir aıta keterlik jaıt, 2016 jyly Qarken Ahmetov atyndaǵy mektep-ınternat-kolledjdiń aýmaǵynda Dzıýdo akademııasy ashylǵan edi. Onyń óz sport zaly, jataqhanasy men ashanasy bar. Sol jerde myqty balýandardyń qalyń shoǵyry ósip keledi. Byltyr sol aka­demııaǵa Fransııanyń dańqty dzıýdoshysy, úsh dúrkin Olımpıada jáne 12 dúrkin álem chempıony Teddı Rınerdiń ózi kelip, jer­gilikti tatamı sheberlerimen birge oqý-jattyǵý jıynyn ótkizdi. Mek­teptiń ujymy muny jaqsylyqqa joryp otyr. Buıyrtsa, keleshekte bizdiń elden de Ted­dıdeı tulǵalar kóptep shyǵatynyna olar senimdi.