Samsung kompanııasynyń áleýmettik jobalar baıqaýyna elimizdiń túpkir-túpkirinen kelgen oqýshylardyń 400-den asa jumysy usynyldy. Ekinshi týrǵa 33 joba ótti. Baıqaý fınalynda 10 joba júldeli oryndar úshin baq talastyrdy. Baıqaýda ekinshi oryn alǵan on bes jastaǵy qaraǵandylyq jas órender zııatkerlik mekteptiń 10-synybynda oqıdy. Olar baıqaýǵa eki jyl buryn bastaǵan Full Speed Wheelchair jobasyn usyndy.
– Qyzdar joba boıynsha jumysty eki jyl buryn bastady. Aldymen olar Qaraǵandy ınfraqurylymynyń mobıldiligi tómen toptarǵa qoljetimdiligin zerttedi. Bizdiń ınfraqurylymdy eskere otyryp, ońaı qozǵalatyn arba qajet dep tapty. Bul máseleni sheshý úshin qyzdar múgedekter arbasyn gıroskýtermen biriktirdi. Arnaıy negizderdiń kómegimen olar artqy dóńgelekterdiń ornyna gıroskýterdi bekitti. Mundaı prototıptiń quny elektr arbasyna qaraǵanda arzan, – deıdi joba jetekshisi Janar Báımetova.
– Bul arbany jasaý kóp ýaqytty qajet etpedi. Biz birinshi prototıpti jasaǵanda, esh kemshiligi baıqalmady. Biraq testileý kezinde kemshilikter anyqtaldy. Kresloda otyrǵanda arbany óshirýge bolmaıdy. Sondyqtan biz túımelerdi rychagtarǵa qosý kerek dep sheshtik, – deıdi Leıla Nurlybaeva.
Baıqaýǵa jumystaryn usynyp, ol birneshe irikteýden ótkenshe alty aı ýaqyt ketken. Degenmen, joba avtorlary baıqaýdyń joǵary deńgeıde uıymdastyrylǵanyn, qatysý arqyly jańa múmkindikterge jol ashylǵanyn jetkizdi.
– Baıqaý barysynda jobanyń ekonomıkalyq quramdas bóligin esepteýge kómektesken Samsung kompanııasynyń tálimgerimen ózara baılanys ornattyq. Baıqaýda paıdaly aqparattarǵa qanyqtyq, fınalda óz jobalarymyzdy basqa qatysýshylardyń ıdeıalarymen salystyryp, tájirıbe jınadyq. Berilgen 2,5 mln teńgege jobamyzdy odan ári ilgeriletýdi, ony jaqsartýdy josparlap otyrmyz. Biz patent alǵymyz keledi. Bolashaqta jobamyzdy monetızasııalaýymyz múmkin, – deıdi Sofııa Dasaeva.
Buǵan deıin de bul joba zııatkerlik mektepter oqýshylary arasyndaǵy baıqaýda jáne ál-Farabı atyndaǵy Qazaq ulttyq ýnıversıteti uıymdastyrǵan respýblıkalyq jobalar baıqaýynda júldeli oryndarǵa ıe bolǵanyn eske sala keteıik.
QARAǴANDY
