Qaırat qıyndyqty jeńedi

Bul kúnde adal eńbeginiń arqa­synda áriptesteriniń qurme­tine bólen­gen Ashat Dahanov Step­no­­gor moıyntirek zaýytyna sonaý 2007 jyldyń qarasha aıynda jumysqa ornalasqanynda kóp jaıdyń retin bile qoımaıtyn. Áýe­li stanoktar men avtomat­tan­dyrylǵan jeliniń retteýshisi bolyp ornalasty. «Kóz qorqaq, qol batyr» degendeı, az ǵana ýa­qyt­tyń ishinde ózine buryn beı­málim óndiristiń tynysyn bir kisi­deı uǵyp alǵany. Asylynda, kez kelgen tehnıkanyń tilin meń­gerý úshin ózin-ózi qamshylap, alǵa umtylsa jetip jatyr. Yn­taly jannyń tula boıyndaǵy ja­lyn atqan qaırat-jigeri jol-jónekeı kezdesken qıyndyqty jeńetinine búginde ózi kámil senedi. Árqıly syzbalardyń syryn uǵyp, nebir kúrdeli qurylǵylardyń qyr-syryn meńgerý de anaý aıt­qan­daı kóp qıyndyq emes edi. 2008 jyldyń qazan aıynda ekinshi razrıadty qaptaýshy bo­lyp aýysty. Arada eki jyl ótken soń moıyntirekterdi jınaıtyn ýchaskeniń slesari bolyp eńbek ete bastady. О́z isin barynsha tııa­naqty, tyńǵylyqty atqa­ra­tyn Ashat Júrsinulynyń alǵa umtylysy, bilmekke qumarlyǵy basshylardyń kózine túspeı qalǵan joq. 2015 jyly osy kásiptegi eń joǵa­ry bolyp sanalatyn tórtinshi razrıadqa ıe boldy.

Kún saıyn qarbalasqan ju­mys­­tan qoly qalt etkende týǵan jeri týraly kóp oılanatyn. Pav­lo­­dar oblysynyń Ertis aýda­n­yn­­da týǵanymen, Qyzylaǵash aýy­lynda er jetken. Sileti óze­­ni­niń jaǵasyndaǵy osy bir shoq juldyzdaı aýyl beınesi kóki­re­gin qyzdyryp, sanasyna qaıta-qaıta orala beredi. At ja­lyn tartyp mingende ótpeli kezeń­­niń ókpek jeli aýyldaǵy aǵaıyndy tońdyryp-aq tur edi. Áýeli mal baqqan. Orman-toǵaıdan ada, kóz ushynda sary saǵym kilkip turatyn saıyn dala. Burynǵy ekonomıkalyq baılanystar úzilip, keńsharlar tarap, qoǵamdyq maldy barter degen «tajal» jutty. Endigi arada el ishinen eki qolǵa bir kúrek tabyla qoımaıtyn syńaıly. Keleshegi alda jas bolǵandyqtan, qıly-qıly oıdyń qaýmalap kelip, zilmaýyr salmaǵymen basa bergeni. Aqyry nar táýekelge bel býǵan. Stepnogor qalasyndaǵy kásibı-tehnıkalyq ýchılıshege oqýǵa tústi. Elektrmen dánekerleýshi mamandyǵyn ıgermek. Ishteı ózi osy qalaýyn qup kórgen. Qazaq bala­synyń mańdaıyna mal ba­ǵý­­dy ǵana jazyp qoıǵan joq shy­ǵar. О́zge jurt tynym tappaı ıge­rip, ushpaqqa shyǵyp jatqan mamandyqty meń­gerip, shyn sheberi atansa, qa­ne­keı! Ashat Júrsinuly adam kez kelgen mamandyqty meń­ger­­gennen keıin óz salasynyń shynaıy sheberi bolýy kerek dep esepteıdi. Sonda artyńnan tabystyń ózi buıdasynan jetektegen taılaqtaı bulǵaqtap erip ózi keledi. Aıtalyq, el ishin­de áldekimniń jylý júıesin dá­ne­kerlep, tartyp berdiń eken deıik. Eshbir kemistigi joq, atqan oqtaı túzý túsken jylý júıesin kórgen adam úı ıesinen muny kim istedi dep taqaqtap suramaı ma? Tozyǵy jetken tehnıkany jón­deseń de, jumys nátıjesin kór­gen traktorshy qolynan is kele­tin sheber ekenin qapysyz tanyp, deregińdi surap alary anyq. Demek, qatardaǵy bireý emes, oza shap­qan shyn sheber bolýyń kerek. Al sheberlik –mashyqpen serik.

Shańyraq kóterdi. Endi otba­syn eshteńeden taryqtyrmaı, qam­tamasyz etýi kerek. Bul da qo­symsha jaýapkershilik júktegen. Ári bir orynda toqyrap qalý tabı­ǵatynan jat. Qaınaǵan óndi­ristiń ishinde júrgennen keıin tutas júıeni bilgen jón. Osy­laısha, az ýaqyttyń ishinde Ashat Júr­sinulyn zaýyt jumysshylary besaspap maman retinde tanydy. Bilimin jetildirip, kásibı deńgeıin ósirýge muqııat den qoıatyn jas maman tártip pen jaýapkershilikti de jas janyna serik etken. О́zi úı­renip qana qoımaı, ókshesin basyp kele jatqan jastardy da úıretýge, bilme­genin aıtyp jiberýge yntyq. Osylaısha, jańa býynnyń kásibı deńgeıiniń ósýine aıanbaı atsalysyp keledi.

Shynaıy sheberdiń shyn yqy­la­syn kórgen zaýyt basshylary da yn­talandyryp otyrýdy umy­tqan emes. 2016 jáne 2022 jyl­dary adal eńbegi úshin alǵys­qa ıe boldy. Sehtyń úzdik jumys­shysy retinde sýreti Qurmet taqtasyna ilindi.

– Ashat Júrsinuly – óz isiniń naǵyz besaspap mamany. Kisilik kelbeti de, adamgershilik ajary da maqtaýǵa laıyq, – deıdi moıyntirek jınaqtaý sehynyń basshysy Dmıtrıı Protasevıch.

Aıtpaqshy, Qurmet taqtasy búginde kózge kóp túse bermeıdi. Asy­­lynda, jalpaq jurtty ju­mys­qa jumyldyrýdyń, abyro­ıyn asqaqtatýdyń ádemi ádisi edi. Aldynan jumys úrkip tu­ra­tyn Ashat Júrsinulynyń Qurmet taqtasyndaǵy beınesi adam eńbe­gimen ardaqty ekendigin uqty­ryp turǵandaı.

Aqmola oblysy,

Stepnogor qalasy