Jalpy, qoǵam alǵa jyljý úshin oǵan qozǵaý salatyn kúsh kerek. Joldaý sol kúshtiń rólin atqaryp, jańa baǵdarlamaǵa jol ashyp, bolashaqqa baǵyt-baǵdar beredi. Tek ony tıimdi paıdalaný árkimniń iskerlik qabiletine baılanysty. Memleket basshysy, máselen, ulttyq bıznestiń áleýetin arttyrý kerek degendi osymen birneshe ret aıtty. Shyn máninde, búgingi qoǵam úshin bıznestiń áleýetin arttyrýdyń mańyzy zor. Onyń qajettiligin bilemiz. Biraq sony qalaı júzege asyrý kerek degenge kelgende taǵy da aıaǵyna jem túsken attaı kibirtiktep qalamyz. Sebebi burynǵy júıege ábden qalyptasyp qalǵan eski kadrlarmen jańa júıe qurý múmkin emes. Prezıdent kadr saıasaty máselesin de oryndy qozǵady. Mine, osy aıtylǵan máseleler qalaı júzege asady eken dep qarap otyrmaı, onyń erterek is júzine asa berýine barshamyz bir kisideı atsalyssaq alynbaıtyn asý, baǵyndyrmaıtyn beles bolmaıdy.
Sondaı-aq bul Joldaýdy maqtashylardyń paıdasyna sheshildi desek bolady. Darbaza–Maqtaaral temirjolyn salý – kópten beri aıtylyp júrgen másele. Prezıdent Joldaýynda bul máselege de nazar aýdaryldy.
Sý resýrstary jáne ırrıgasııa mınıstrligin qurý jónindegi sheshimi aıryqsha qoldaýǵa turarlyq. О́ıtkeni sýdy tirshilik kózi deıtin bolsaq, sońǵy kezderi bul másele kún tártibinde ótkir tur. Tirshilik kózin tıimdi paıdalanýdyń mańyzy zor. Men ózim aýyl sharýashylyǵy mamany bolǵandyqtan, Joldaýdaǵy ıgi bastamalardy ret-retimen saralap kóreıin.
Birinshi, bizge keletin aǵyn sý 3 memleketten ótip keletinin eskersek, Sý resýrstary jáne ırrıgasııa mınıstrligi aýadaı qajet. Sýsyz ónim de, ómir de joq. Tek kórshilermen utylmaıtyn mámilege kelip, dıplomatııalyq kelissózderdi baıypty júrgizgen jón. Bul salanyń mınıstri birinshi kezekte dıplomat bolýy kerek. Ishki jaǵdaıdy rettep, sala mamandary arqyly arnalardy, aryq-atyzdardy, qatań baqylaýda ustaýy kerek.
Ekinshi, Darbaza–Maqtaaral temirjoly. Túrkistan oblysynyń qıyrdaǵy Myrzashól aımaǵyndaǵy «aq altyndy» Maqtaaral aýdanyna temirjoldyń barýy tek qarym-qatynas úshin ǵana emes, shekarada qalyp qoıǵan aýyl-aımaqtar úshin de, elimizdi kókónispen qamtamasyz etip otyrǵan aımaqtar úshin de strategııalyq turǵydan óte mańyzdy. Ári arzandaý bolar edi. «Keńesip pishken ton kelte bolmasa kerek»...
Úshinshi, otandyq ónim óndirýshilerdi qoldaý. Osy máselemen eki myńynshy jyldan beri aınalysyp kelemiz. Neshe túrli qıturqy áreketterdiń kýásimiz. Birinshiden, satyp alýshylardyń «berseń de ber bes teńge, bermeseń de ber bes teńge» degen qylyǵy dıqandardy qajytyp bitti. О́nim óndirýshiler ónimi pisken soń solardyń aıtqan baǵasyna ótkizýge májbúr. Egistigińdi sýaratyn aǵyn sý óte qymbat. Amal joq, aıtqan aqshasyn tólep alasyń. Monopolııaǵa qarsy agenttik qyzmetkerleri bul turǵyda beıtarap qalyp ustanady, «sen tımeseń, men tımen» deıdi. Sonda dıqandardyń quqyǵyn kim qorǵaıdy? Endi Joldaýdaǵy «otandyq ónim óndirýshilerdi qoldaý» baǵdarlamasyn oqyp, bizdiń de kúnimiz týdy dep qýanyp otyrmyz.
Turǵanbek QANAEV,
«Aqorda» sharýa
qojalyǵynyń tóraǵasy
Túrkistan oblysy,
Shardara aýdany
