Álemdik dodalarda buǵan deıin top jaryp júrgen Bolat Sapardyń bul joly da altyn tuǵyrdan kórinetin zor múmkindigi bar edi. О́kinishke qaraı, baǵy janbady. Buǵan Bolattyń saǵy syna qoıǵan joq. Jas balýan kelesi básekelerinde fınalda jibergen qateligimen jumys isteımin dep berik bekinip otyr. Jigerli jigitke biz de senim bildiremiz.
Bolat balýan buǵan deıin de bási bıik básekelerde tamasha beldesip júrdi. Atap aıtar bolsaq, 2021 jyly Tashkentte sambo kúresinen jastar arasynda Azııa birinshiliginde 88 kg salmaq dárejesinde beldesip, sary qurlyq chempıony atanǵan. Sol jyly taǵy da Tatarstannyń Qazan qalasynda ótken TMD elderiniń kil myqtylary qatysqan básekede kúmiske qol jetkizgen-tin.
Sambomen segiz jasynan bastap jattyqqan Bolat: «Bala kezimnen daıyndap kele jatqan, árqashan qoldaý kórsetken bapkerim Madııar Mananbaevqa rızashylyǵymdy jetkizgim keledi. Bıikten kórinýime eńbegi ábden sińdi», deıdi.
Jerlesimiz byltyr «Jyldyń úzdik sportshysy» atanǵan. Nege deseńiz, ol úshin ótken jyl jemisti de jeńisti boldy. Almatydaǵy halyqaralyq týrnırde, Aqtaýdaǵy Azııa kýboginde, Bishkektegi halyqaralyq týrnırde top jarǵan ol eldiń týyn bıikke kóterdi.
B.Sapardyń sambodan álem juldyzy bolatynyna álden sengimiz keledi. Jattyǵý zalynda tabandap júrip jattyǵatynyn, talabynyń taýdaı ekenin shákirtin bes saýsaqtaı biletin jattyqtyrýshysynyń ózi de aıtyp otyr.
Qaraǵandy oblysy
