Áskerıler: memlekettik til saıysy

Ulttyq áskerı-patrıottyq or­ta­­lyqta uıymdastyryl­ǵan mem­le­kettik til bilgirleriniń saıysy Qa­rý­ly kúshterdiń qu­rylymdyq bólimsheleri ara­syndaǵy «Qazaq­stannyń bola­shaǵy – qazaq tilin­de» atty aılyqtyń sheshýshi kezeńi boldy. Memlekettik tildi nasıhattaý jáne onyń qoldaný aıasyn keńeıtý, áskerı qyzmetshiler­di  patrıotızm rýhynda tárbıeleý, jeke qu­ram arasynda ártúrli ult ókil­deriniń dostyǵyn nyǵaıtý maq­satynda ót­ken baıqaýǵa qa­ty­sýshylar memleket­­tik tildi erkin meńgergendikterin kór­sete bildi. Shyǵarmashylyq sa­ıysqa Qarýly kúshter túr­leri men qurylymdyq bólim­shelerinen bes adamnan turatyn alty komanda qatysty. Olar – «Arystan» (55765 áskerı bólimi), «Jeruıyq» (Qurlyq áskerleri), «Áýe qyrandary» (Áýe qorǵanysy kúshteri), «Tár­tip saqshylary» (Áskerı polı­sııa), «Jalyn» (Áskerı kol­ledj) jáne «Alash» (Desant­tyq-shabýyldaý áskerleri).

Baıqaýdyń «О́leń – sóz­diń patshasy» dep atala­tyn bi­rinshi keze­ńin­de bel­gili q­azaq aqyndarynyń shy­ǵar­ma­larynan alty shýmaq óleń­di jatqa oqý kerek bolsa, ke­lesi kezekte «Úı tapsyr­masy» tekserildi. Onda koman­dalar kórermen nazaryna sahnalyq kórinisterin usyndy. Úshinshi kezeńde ónerpazdar ár ulttyń kıimderi men mádenıetin kór­sete otyryp, án nemese bı oryndady. Komandalardyń bólingen ýaqytty qatań saqtaýyna, ózge ult ókilderiniń memlekettik tilde erkin jáne taza sóıleýine, óleńdi mánerlep oqýyna, mátinniń kórkem ıdeıalaryn asha bilýine, sondaı-aq sahna sheberligi men mádenıetine erekshe nazar aýdaryldy.

Saıys qorytyndysy bo­ıynsha «Tártip saqshylary» komandasy jeńimpaz atandy. Ekinshi oryndy «Alash» ko­man­dasy ıelense, úshinshi oryn «Jeruıyq» komandasyna buıyrdy. Basqa komandalar da nazardan tys qalmaı, barlyǵy Qorǵanys mınıstriniń alǵyshatymen jáne estelik káde­syılarmen marapattaldy.

Baıqaý jeńimpazdary men qa­tysýshylardy quttyqta­ǵan Qor­ǵanys mınıstrligi ap­para­ty­nyń basshysy, polkov­nık Erbol Qu­marbekuly memlekettik tildi meńgerý árbir azamattyń mindeti ekenin atap ótti. Ol bul is-shara «Qazaqstan Res­pýb­lıkasynda til saıasatyn iske asyrýdyń 2020-2025 jyl­darǵa arnalǵan memlekettik baǵ­­darlamasyn» oryndaýǵa baǵyt­talǵanyn da atap ótti.