Elimizde 2013 jyldan beri jyl saıyn qyrkúıektiń ár sońǵy jeksenbisinde Eńbek kúni merekelenip keledi. Bıyl bul aıtýly kún 24 qyrkúıekke tuspa-tus kelip otyr. Eńbek kúni kúntizbedegi eńbek merekesi ǵana emes, eńbek sapasynyń kórsetkishi deýge de bolady. Buǵan turaqty jumyspen qamtý, eńbek qaýipsizdigi, eńbekaqynyń laıyqty deńgeıi, áleýmettik kepildikter jatady.
– Eńbek kúnin merekeleý dástúri álemdik tájirıbede bar. Qazir jer-jahannyń júzden asa eli bul kúndi aıryqsha atap ótedi. Al Jańa Zelandııa, Japonııa, Qytaı, Reseı, Belarýs qatarly elderde bul kún tipti memlekettik mártebege ıe. Biz de elimizdegi eńbek qundylyǵyn arttyrý maqsatynda bul kúnge aıryqsha mán berip otyrmyz. Mereke qarsańynda birqatar shara ótkizý josparlanǵan, dedi Eńbek jáne halyqty áleýmettik qorǵaý vıse-mınıstri Aqmádı Sarbasov.
Mınıstrliktiń málimetine sensek, Eńbek kúni aıasynda úzdik eńbek áýleti men óndiristiń úzdik jumyskerlerin anyqtaýǵa baǵyttalǵan jyl saıynǵy «Eńbek joly» respýblıkalyq baıqaýyna bıyl 591 ótinish qabyldanypty.
– О́ńirlik kezeńniń jeńimpazdaryn oblys ákimderiniń orynbasarlary basqaratyn komıssııalardyń qazylyǵymen anyqtalyp, saltanatty túrde marapattalady. Jeńimpazdar baıqaýdyń respýblıkalyq kezeńine joldama alady. Al respýblıkalyq kezeńniń jeńimpazdaryn Eńbek mınıstrliginiń janyndaǵy komıssııa baǵalaıdy. Ol komıssııa quramynda Parlament depýtattary, qoǵamdyq kelisim men áleýmettik áriptestik ókilderi kiredi, deıdi vıse-mınıstr.
Sonymen qatar Eńbek jáne halyqty áleýmettik qorǵaý mınıstrliginiń baspasóz hatshysy Sáken Dildahmet respýblıkalyq jáne óńirlik deńgeıde eńbek adamyn nasıhattaý maqsatynda aýqymdy aqparattyq jumystar júrgizilip jatqanyn jetkizdi.
– 24 qyrkúıek kúni «Habar» telearnasynda 4 saǵattyq telemarafon ótedi. Bul telemarafonnyń basty maqsaty – Eńbek kúnine oraı óndiriste, aýyl sharýashylyǵynda, áleýmettik salalarda jumys istep jatqan azamattardyń eńbegin kórsetý. Buǵan qosa Eńbek kúnin atap ótýge baılanysty teleserıaldar, arnaıy baǵdarlamalar da shyǵady, dedi S.Dildahmet.
Sondaı-aq vıse-mınıstr mereke qarsańynda eńbek qundylyqtaryn arttyrý maqsatynda eńbek adamdary men túrli kásip ókilderi týraly derekti fılmder túsirý, aqparattyq materıaldar, rolıkter, sıýjetter shyǵarý, stýdenttik pikirtalastar, «Eńbek galereıasy» atty fotokórmeler jáne sporttyq sharalar ótkiziletinin aıtty.
«Eńbek joly» baıqaýynyń jeńimpazdary 22 qyrkúıek kúni Astanada Eńbek kúnine oraı ótetin forým barysynda jarııalanady. Jeńimpazdarǵa aqshalaı sertıfıkattar men estelik syılyqtar tabys etiledi.
