Sýretti túsirgen – Jumabaı Musabekov
Asqaq Alataýdyń kórikti tabıǵatynyń tósinde at tuıaǵyn dúbirletip júrgen qyz-jigitterdiń sheberligi talaıdy tánti etip keledi. At jalynda oınaıtyn jastardyń deni Talǵar aýdanynyń Rysqulov, Bereke aýyldarynan bolsa, arasynda almatylyq arýlar da bar.
«Búginde kópke málim «Ǵundar» etnoaýylyna kelip demalýshylarǵa ulttyq salt-dástúrlermen birge, ulttyq oıyndar, sonyń ishinde at sportyn tamashalaýǵa múmkindik jasalǵan. Etnoaýyl basshysy Asylhan Myrzabekqyzynyń uıytqy bolýymen 2017 jyldan bastap «Sarbaz rýhy» degen ataýǵa ıe komanda jasaqtalyp, ulttyq ónerimizdi kórsetýmen aınalysyp kelemiz. Komanda sapyndaǵy oıynshylar sany 100-ge jetti. Olardyń quramynda elimizdiń ár túkpirinen kelgen atsúıer sportshy jastar bar. Maqsatymyz – jastardy at sportyna baýlý, ýaqyttaryn tıimdi ótkizýge atsalysý», deıdi komanda jattyqtyrýshysy Qýan Sopybekov.
At sportyna áýes jastardyń taqymy qataıyp, tájirıbesi shyńdalǵan soń olardy elimizdiń ár aımaǵyndaǵy túrli ulttyq oıyn-saýyqtarǵa qatystyrý, oǵan qosa shetelderge shyǵarý júıeli túrde jolǵa qoıylýy komanda quramyn qanattandyra tústi. At jalynda oınaıtyn 18 ben 25 jas aralyǵyndaǵy qyz-jigitter naıza laqtyrý, sadaq atý, teńge ilý, qyz qýýmen qatar, at ústinde túrli oıyn órnegin qurýǵa ábden mashyqtalǵan.
«Komandamyzdaǵy almatylyq Aısel Amanǵalıeva, Arýjan Toqtarbek, Raıymbek aýdanynan kelgen Dıana Jaǵalbaeva sekildi arýlardyń at ústinde óner kórsetetin sheberlikterinde min joq. Júrekti qyzdarymyz at qulaǵynda oınaǵanda talaıdyń tańdaıyn qaqtyryp keledi. Biz olarmen árdaıym maqtanamyz», deıdi talantty jas Birjan Saǵymjan.
Endeshe «Ǵundar» etnoaýylyndaǵy ulttyq sporttyń máıegine aınalǵan «Sarbaz rýhy» komandasyna sáttilik tileımiz.
Almaty oblysy
