Keńeıtilgen jáne shaǵyn quramda ótken kelissóz barysynda taraptar eki el arasyndaǵy yntymaqtastyq máselesi boıynsha oılaryn ortaǵa salyp, pikir almasty.
Eki eldiń ortalyq memlekettik organdarynyń basshylary qatysqan úkimetaralyq keńes otyrysynda saýda-ekonomıkalyq yntymaqtastyqty nyǵaıtý, aǵyn sýdy tıimdi paıdalaný jáne energetıka salasyndaǵy ózara is-qımyl, ónerkásip pen AО́K-ke kooperasııalyq jobalardy birlese iske asyrý, memleketter arasyndaǵy tranzıttik-kólik áleýetin arttyrý, týrızm, mádenıet salalaryndaǵy jobalardy birlese iske asyrý máseleleri sóz boldy.
Kezdesý barysynda Premer-mınıstr Álıhan Smaıylov kórshi eki el basshylarynyń kúsh-jigeriniń arqasynda keıingi ýaqyttarda qazaq-qyrǵyz strategııalyq seriktestigi sony serpinmen damı túskenin tilge tıek etti.
«Qyryzstan – biz úshin tatý kórshi, baýyrlas el ǵana emes, sondaı-aq mańyzdy saýda-ekonomıkalyq seriktes memleket», dedi Á. Smaıylov óz sózinde.
Keıingi jyldary baýyrlas eki el arasyndaǵy ózara taýar aınalymy edáýir artqan. Derekterge sensek, 2022 jyly kórshi memleketter arasyndaǵy saýda kólemi shamamen 19 paıyzǵa ósip, 1,3 mlrd dollardy quraǵan. Osy jyly da oń dınamıka qalyptasqan. Naqtyraq aıtar bolsaq, jeti aıdaǵy taýar aınalymy 13 paıyzǵa artyp, 757 mıllıon dollarǵa jetken.
Premer-mınıstr Á.Smaıylovtyń aıtýynsha, tranzıt, kólik, kommýnıkasııa, týrızm jáne basqa salalarda da kórshi elder arasynda berik yntymaqtastyq ornaǵan. Sondaı-aq ónerkásiptik kooperasııa, aýyl sharýashylyǵy, sıfrlandyrý salalarynda da perspektıvaly bastamalar az emes.
Úkimet basshysynyń sózine súıensek, aldaǵy ýaqytta birlesip atqaratyn birqatar mańyzdy jobany jedeldetip iske asyrý kerek. Anyǵyraq aıtsaq, jýyq arada shekara mańyndaǵy aımaqtarda ındýstrııalyq saýda-logıstıkalyq keshen qurý jańa kooperasııalyq jobany júzege asyrýǵa aıryqsha yqpal etedi. Bul qadam óz kezeginde eki el basshylary ýaǵdalasqandaı, taýar aınalymyn 2 mlrd dollarǵa deıin jetkizý jónindegi tapsyrmany oryndaýǵa aıtarlyqtaı úles qosady.
Kórshiles eki el Úkimetiniń basshylary Qazaqstan men Qyrǵyz respýblıkasynyń ortaq múddesin eskere otyryp, ózara qurmet pen tatý kórshilikke negizdelgen aǵyn sý salasyndaǵy is-qımyldy odan ári jalǵastyrýdyń mańyzdylyǵyn atap ótti.
«Bizdiń halqymyzdyń ómirine tikeleı áser etetin ekologııa jáne sýdy utymdy paıdalaný salasynda yntymaqtastyqty damytýdyń mańyzy zor. Sý resýrstaryn ádil jáne ashyq basqarýdy qamtamasyz etý maqsatynda bizge memleketaralyq sý sharýashylyǵy kanaldaryn sıfrlandyrý arqyly tıimdi monıtorıng júrgizý qajet ekeni sózsiz. Gıdrologııalyq aqparat almasýdy, atap aıtqanda, sý qoımalaryna keletin aǵyn sý jáne basseın boıynsha sý alý jóninde aqparattarmen qamtamasyz etý mańyzdy», dedi Álıhan Smaıylov óz sózinde.
Úkimet basshysynyń aıtýynsha, sý resýrstaryn birlesip paıdalanýdyń quqyqtyq tetigin jetildirýdiń ózara tıimdi yntymaqtastyqty nyǵaıtýdaǵy yqpaly zor.
Basqosý barysynda Á.Smaıylov eki el arasyndaǵy mádenı-gýmanıtarlyq baılanystardyń da qalypty damyp kele jatqanyna toqtaldy.
«Qazaqstannyń 2021 jyly Qyrǵyzstandaǵy, 2022 jyly Qyrǵyzstannyń Qazaqstandaǵy mádenıet kúnderi tájirıbelik jáne rýhanı baılanystardyń damýyna oń septigin tıgizdi», dedi Qazaqstan Premer-mınıstri óz sózinde.
Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Aqylbek Japarov eki el basshylarynyń jýyrdaǵy ózara saparlary barysynda ekijaqty yntymaqtastyqtyń negizgi baǵyttary aıqyndalǵanyn atap ótti.
«Baýyrlas elder halyqtyń ıgiligi úshin ýaǵdalastyqtardy ilgeriletý maqsatynda kúsh salatynyna kúmán joq. Tatýlyq negizinde óristep kele jatqan baılanysymyz nyǵaıa beretini daýsyz», dedi A.Japarov óz oıyn ortaǵa salyp.
Forýmnyń plenarlyq otyrysynda Jambyl oblysynyń ákimi Erbol Qarashókeev, Almaty oblysynyń ákimi Marat Sultanǵazıev, Qyrǵyz Respýblıkasy Prezıdentiniń Talas oblysyndaǵy ýákiletti ókili Núrbek Dardanov pen Ystyqkól oblysyndaǵy ýákiletti ókili Ilıaz Imanbetov sóz sóılep, óńirler arasyndaǵy baılanysty nyǵaıtýdyń mańyzdylyǵy týraly oılaryn ortaǵa saldy.
«Oblystar men qalalar arasyndaǵy tikeleı baılanys, óńiraralyq dostyq pen yntymaqtastyqty nyǵaıtý – qyrǵyz-qazaq memleketaralyq baılanystaryn jańa deńgeıge kóterýdiń negizi. О́ńiraralyq dıalogti keńeıtý eki el arasyndaǵy strategııalyq áriptestikke oń áser etedi.
Biz óńirdegi kólik-logıstıka, sý jáne energetıka, saýda-ekonomıkalyq qatynastardy damytýǵa aıryqsha basymdyq beremiz. Osy turǵydan alyp qaraǵanda ónerkásiptik saýda-logıstıkalyq keshenniń qurylysy qolda bar saýda-logıstıkalyq áleýetti joǵary tıimdilikpen paıdalanýǵa mol múmkindik beredi», dedi Aqylbek Japarov óz oıyn túıindep.
Qazaqstan Respýblıkasynyń Premer-mınıstri Álıhan Smaıylovtyń aıtýynsha, elimizde úsh jarym myńǵa jeteǵabyl birlesken kásiporyn jumys istep tur. О́tken jyldan beri olardyń qataryna jańadan 200-ge jýyq jańa kompanııa qosylǵan.
Kelissózderge negizdelgen forým qorytyndysynda taraptar yntymaqtastyqtyń barlyq ózara tıimdi baǵyttary boıynsha belsendi is-qımyldardy qoldaýǵa daıyn ekenin rastady.
Jambyl oblysy
