Foto: Qorǵanys mınıstrligi
Elordadaǵy áskerı kolledjde elimizdiń birinshi Qorǵanys mınıstri, Keńes Odaǵynyń Batyry, Halyq Qaharmany, armııa generaly Saǵadat Nurmaǵambetovti eske alýǵa arnalǵan sharaǵa generaldar, ofıserler, serjanttar, kadetter, ulandar, sondaı-aq ardagerler men basqa da qonaqtar qatysty. On jyl buryn elimizdiń eń uly áskerı qaıratkerleriniń biri ómirden ozdy.
1945 jyly dańqy jer jaryp, aty ańyzǵa aınalǵan general bıýstiniń janyna onyń esimi berilgen áskerı kolledjdiń búkil jeke quramy sap túzedi. Batyrdyń eskertkishine gúl shoqtary qoıyldy.
Bir mınýt únsizdikten keıin Qorǵanys mınıstriniń orynbasary general-leıtenant Sultan Kamaletdınov sóz sóıledi. Ol Qazaqstannyń birinshi Qorǵanys mınıstriniń jaýyngerlik joly ańyzǵa toly ekenin, qazaq halqynyń batyr uly memleketke jáne bolashaq urpaqqa qyzmet etýdiń, erlik pen jaýynger abyroıynyń, ar-namys pen adamgershiliktiń úlgisi bolǵanyn atap ótti.
«Saǵadat Nurmaǵambetov Qarýly kúshterdi qurýǵa, ony qalyptastyrýǵa jáne damytýǵa baǵa jetpes úles qosty, áskerdi jańa jetistikterge jetkizdi. Batyrdyń esimi halyq jadynda máńgi saqtalady. Armııa generaly Saǵadat Nurmaǵambetov salǵan dańqty jaýyngerlik dástúr jalǵasady dep senemin»,, dedi Qorǵanys mınıstriniń orynbasary.
Almaty óńirlik garnızonynda Qazaqstan Respýblıkasynyń birinshi Qorǵanys mınıstri, armııa generaly Saǵadat Nurmaǵambetovti eske alýǵa arnalǵan is-shara ol turǵan úıdiń janynda bastaldy. Oǵan týǵan-týystary, desanttyq-shabýyldaý áskerleri qolbasshylyǵynyń, jergilikti áskerı basqarý organdarynyń, ardagerler uıymdarynyń ókilderi jáne qalanyń áskerı-patrıottyq klýbtarynyń tárbıelenýshileri qatysty. Saǵadat Nurmaǵambetovtiń úıiniń janyna jınalǵandar 28 gvardııalyq-panfılovshylar saıabaǵyndaǵy Máńgilik alaýǵa gúl shoqtaryn qoıdy. Munda óskeleń urpaq úshin «Erlik sabaǵy» ótkizildi.
