Otyrysty ashqan Erlan Qoshanov byltyr Qazaqstan men Vetnam arasynda dıplomatııalyq qarym-qatynas ornaǵanyna 30 jyl tolǵanyn atap ótti. Osy jyldar ishinde belsendi saıası dıalog jolǵa qoıylyp, elder arasyndaǵy jan-jaqty yntymaqtastyqtyń berik irgetasy qalandy.
– Siz Prezıdent Qasym-Jomart Toqaevtyń Vetnamǵa resmı saparynan bir aı ótken soń kelip otyrsyz. Bul elderimiz arasyndaǵy ózara túsinistik pen senimniń joǵary deńgeıin kórsetedi. Búgin bizde memleket basshylarynyń kelisimderine sáıkes Parlamentter arasyndaǵy yntymaqtastyqtyń basym baǵyttaryn talqylaýǵa tamasha múmkindik bar, – dedi E.Qoshanov.
Kezdesý barysynda taraptar 2015 jyldan beri belsendi damyp kele jatqan parlamentaralyq baılanysty pysyqtady. Búginde Májiliste 12 depýtattan turatyn Vetnam Sosıalıstik Respýblıkasymen dostyq toby bar. Oǵan Halyqaralyq ister, qorǵanys jáne qaýipsizdik komıtetiniń tóraǵasy Aıgúl Quspan jetekshilik etedi. Qazaqstan tarapy osyndaı dostyq toptary, tıisti komıtetter arqyly kópjaqty platformalarda birlesip jumys isteýge jáne zańnama salasynda tájirıbe almasýǵa daıyn ekendikterin bildirdi.
Májilis spıkeri Qazaqstandaǵy saıası-ekonomıkalyq reformalar men Prezıdenttiń jýyrdaǵy Joldaýynan habardar etip, onyń basty maqsaty – jańa ekonomıkalyq model qurý ekenin aıtty.
– Bul qadam óńdeý salasyn, bank sektoryn, jasandy ıntellektini damytýdy jáne ınvestısııa tartýdy kózdeıdi. Osy turǵyda biz vetnamdyq áriptestermen birlesken jobalardy júzege asyrý úshin dıalogqa ashyqpyz, – dedi Májilis tóraǵasy.
Ngýen Hak Dın óz kezeginde Vetnam Ortalyq Azııadaǵy eń iri seriktes retinde Qazaqstanmen saýda jáne óndiris áleýetin arttyrýǵa múddeli ekenin aıtty. Taraptar ınvestısııa boıynsha ekijaqty kelisimderdi jańartý, logıstıkalyq dálizderdi keńeıtý, birlesken óndiristerdi, sonyń ishinde eksportqa baǵyttalǵan óndiristerdi damytý qajettigin atap ótti.
Depýtattar jeńil ónerkásip, aýyl sharýashylyǵy, tranzıttik dálizder salalaryndaǵy elaralyq jobalardyń áleýeti zor ekenine nazar aýdardy. Májilis spıkeri Qazaqstan Azııa men Eýropa arasyndaǵy kontınenttik baǵyttardyń 80 paıyzǵa jýyǵyn qamtamasyz etetinine, al 2019 jyly iske qosylǵan «Vetnam – Qytaı – Qazaqstan» temirjol baǵyty eki el arasyndaǵy júkterdi jetkizýge jaqsy múmkindik beretinine toqtaldy.
Taraptar týrızm, mádenı-gýmanıtarlyq baılanys pen elder arasyndaǵy áýe qatynasy salasyndaǵy yntymaqtastyqty keńeıtý múmkindikterin de talqylady.
