Armavır qalasyndaǵy «Armavır Stedıým» stadıonynda ótken básekede Madııar Kembilov jattyqtyratyn Qazaqstan ulttyq quramasynyń qyzdary 2:1 esebimen jeńiske jetti. Kezdesýdiń 27-mınýtynda jerlesterimizden Áselhan Turlybekova mergendigimen kózge túsip, oıynnyń esebin ashty. Ekinshi taımnyń 54-mınýtynda alań ıeleri sapynan Veronıka Asatrıan jergilikti jankúıerlerdi qýantyp, tarazy basyn teńestirgen edi. Alaıda armenııalyqtardyń qýanyshy kópke sozylǵan joq. Arada úsh mınýt ótkende Araılym Orynbasarova Qazaqstan quramasynyń jeńis golyn soqty.
Munyń aldynda elimizdiń qyzdar quramasy Estonııa fýtbolshylarymen jasyl alańda jolyǵyp, 0:0 esebimen teń túsken edi. Osylaısha, eki matchta tórt upaı jınaǵan Madııar Kembilov shákirtteri óz tobynda kósh bastady. Jerlesterimiz keıingi kezdesýlerin 26, 31 qazan kúnderi ótkizedi. Alǵash óz alańymyzda Izraıl quramasyn qabyldasa, keıinnen Tel-Avıvke sapar shegedi.
