Mergen qyz

– Jeńiske jetkenime óte qýa­nysh­tymyn. Eń birinshi maqsat fınalǵa iligý, medal alý boldy, – dep bastady Ásem áńgimesin.

– Búgin eki medal buıyrdy. Koman­dalyq saıysta – altyn, jekeleı synda qola medal jeńip aldym. Endi qoldan kelgenniń barlyǵyn jasa­dyq. Komandalyq jarystyń fınaly óte tartysty ótti. Sońǵy múmkindikke de­ıin Qytaı quramasynan utylyp kele jatqanbyz. Biraq sońǵy serııaǵa deıin bar kúshimizdi saldyq. Sonyń nátıjesinde jeńiske jettik. Qytaı mergenderi óte myqty, moıyndaý kerek. Olar tek Azııada ǵana emes, álem boıynsha myqty quramalardyń biri sanalady. Qytaıǵa kelip altyn alý degen, – biz úshin keremet nátıje.

Búginde Hanchjoýda kún ystyq, aýa raıy ylǵaldy bolyp tur. Bizdiń sportshylardyń nátıjesine bul faktor da áser etken syńaıly.

– Jalpy ońaı bolǵan joq. Kún ystyq. Sol jaǵy kedergi keltirdi. So­ǵan qaramastan barynsha tyrystyq. Altyn alǵannan keıin ústimizden júk tús­kendeı boldy. Fınal ońaı bolmaıtynyn bil­dim. Qytaı quramasynyń qol­daýy, jan­kúıerleri óte myqty ekenin ózderińiz de kórip júrsizder ǵoı. Barǵa qanaǵat etýshi halyqpyz, jekeleı saıysta qola medalǵa da shúkir etemin. Eń bastysy, komandalyq saıys­ta altyn aldyq. Mańyzdysy da sol, – deıdi Ásem.

Bir qyzyǵy, Ásemniń chempıon bol­ǵanyn anasy Álııa Meterbaeva sabaq ústinde estipti. Ol aýylyna ha­barlasyp, birinshi kezekte anasyn qut­tyqtaǵanyn aıtty.

– Ákemniń aty-jóni – Marat Meter­baev. Ol kisi júrgizýshi. Anamnyń esi­mi – Álııa, Almaty oblysy Ile aýdany Yntymaq aýylynyń ál-Farabı atyndaǵy №46 mektebiniń aǵylshyn tili pániniń muǵalimi. 35 jyldyq eń­bek ótili bar. Keler jyly zeınet­ke shyǵady. О́zim de sol mektepte bi­lim aldym. Aýylymyzda eki mektep bar. Almatynyń irgesinde tur­ǵan­dyqtan, munda shamamen 5 myń­daı halyq turady. Men aldymen, anama habarlasyp, qut­tyq­tadym. Sóıtsem, anam bizdiń chempıon bolǵanymyzdy sabaq ústinde muǵalimder men oqýshylar quttyq­tap kelgende estipti. Aýylǵa kóp bara ber­meımin. Únemi jattyǵý jıyndarynda, jarysta júremin. Jylyna anamdy otyz kún kóremin be, joq pa, bilmeımin. Alaıda sol eńbegim zaıa ket­peı, júlde alǵanyma rızamyn, – dedi ol.

Keıipkerimiz bul jeńis qajyrly eńbektiń arqasynda kelgenin aıtyp, aldaǵy ýaqyttaǵy josparymen bólisti.

– Bul jeńis bizge ońaı kelmedi. Talaı jylǵy eńbektiń aqtalǵanyna shúkir­lik etemin. Osy jeńistiń barlyǵy eńbek pen jaýapkershiliktiń jemisi. Men ádildikti, jaýapkershilikti jaq­sy kóremin. Múmkin bolǵan jaǵdaıda týys­taryma, dostaryma kóńil bólip qo­lymnan kelgenshe kómektesemin. Stend atýǵa qyzyǵýshylyǵym 8-synyp­ta bastaldy. Alǵashynda bapkerler meniń tym kesh kelgenimdi aıtyp, úıirme­ge alǵysy kelmedi. Biraq men ózim­niń eptiligimdi kórsetip, tez úırenip aldym. Mine, sodan keıin ulttyq qu­ra­maǵa iligip, elimizdiń namysyn qorǵap júrmin. Bıyl álem ký­boginde top jardym. Azııa oıynda­rynan eki júlde enshiledim, – dedi chem­pıon.

Ásem egizdiń syńary eken. Son­daı-aq ol turmys qurmaǵanyn, bıyl­dan qalmaı turmysqa shyǵatynyn aıtty.

– Úıde úsh balamyz. Men – egizdiń syńarymyn. Áset esimdi syńarym men úlken aǵam bar. Olardyń árqaı­sysy óz sharýasymen júrgen jandar. Tur­mys qurmaǵanmyn. Alla ná­­sip etse, bıyl­dan qalmaı kúıeýge shy­­ǵamyn. Bola­shaq jarymdy tanı­syz­dar, biraq esimin aıtpaımyn. Ke­ıin bile jatarsyz­dar, – dedi Azııa oıyn­darynyń jeńimpazy.