Ákimniń pikirinshe, turǵyndarmen kezdesýde jıi kóteriletin máseleniń biri – mektepterdi arnaıy avtobýspen qamtý jaıy. Máselen, ótken jyly oqýshylar 49 avtokólikpen tegin tasymaldaǵan. Endi bıylǵy jańa oqý jylynda 60 eldi mekendegi 4 561 oqýshyny tasymaldaý josparlandy. Buǵan 1,4 mlrd teńge qosymsha bólinip, 23 avtobýs satyp alý kózdelipti.
– Turǵyndardyń ótinishin eskerip, mektepter úshin elimizde shyǵarylǵan avtobýstardy satyp aldyq. Bul kólikpen oqýshylar tasymaldanady. Maqsat – elimizdiń keleshegi sanalatyn búgingi balalardyń qaýipsizdigin qamtamasyz etý. Oqýshylarǵa sapaly bilim men tárbıe berip, qolaıly orta qalyptastyrýymyz qajet. Eń myqty ınvestısııa – básekege qabiletti adamı kapıtaldy damytýǵa, bilimge salynǵan ınvestısııa, – deıdi Serik Shápkenov.
Jeti aýdan men Atyraý qalasyndaǵy 15 bilim berý ordasyna 15 avtobýs berildi. Endi qazan aıynda taǵy 8 avtobýs jetkiziledi. Sary tústi avtobýsta 36 oryn jáne erekshe balalarǵa arnaıy qurylǵy, beınekamera bar.
Atyraý oblysy
