ÚKIMET О́ŃIRGE QOLDAÝ KО́RSETPEK

Keshe respýblıka Úkimetiniń basshysy Kárim Másimov jumys saparymen elimizdiń shyǵysynda boldy. Onyń bul sapary Semeıden bastaldy. Premer-Mınıstr ushaqtan túsken bette atbasyn qalanyń Jańasemeı bóligindegi birinshi jylý-energetıkalyq ortalyǵyna tiredi. Al onyń mánisi de joq emes-ti. О́ıtkeni, jylý men energııa Semeı úshin nómiri birinshi máse­le­ge aınalǵaly qashan? Mundaǵy qap­taǵan qazandyqtardan qaıran bolmaı otyrǵany da shyndyq. Ras, sońǵy jyldary Elbasynyń tike­leı qamqorlyǵymen bul másele bir­shama retke kelip qaldy. Sóı­tip, burynǵy 46 qazandyqtyń jıyr­masy jabyldy. Olardyń aldy osydan seksen jyldaı buryn salynǵan. Jáne sonyń seksen paıyzynyń ábden tozyǵy jetken. Munyń syrtynda jer asty qubyrlarynyń jaı-kúıi de sondaı edi. Áıteýir, qarajat bólingen soń jaǵdaı ońala bastady. Sonyń aıǵaǵyndaı, sońǵy birer jylda ondaǵan shaqyrym qubyrlar jańartyldy. Dese de, qalanyń Jańasemeı bóligin jylýmen qamtamasyz ete­tin birinshi jylý-energetıka ortalyǵyn iske qospaıynsha is bitti deýge kelmeıdi. Al ol sharýamen mine, bıyl úshinshi jyl Koreıanyń “Qus joly” dep ata­la­tyn jaýapkershiligi shekteýli serik­testigi aınalysýda. Kárim Qajymqanuly osyndaǵy bý qazan­dyǵynyń jumysymen tanysyp bolǵan soń ortalyqtyń qurylys alańynyń basynda kóshpeli jıyn ótkizdi. Onda eń aldymen oblys ákimi Berdibek Saparbaev bul aımaqta ótken qystyń qalaı aıaqtalǵanyn aıta kelip, aldaǵy qysqa daıyndyqpen tanystyrdy. Oblys ákimi de, budan keıin sóz al­ǵandar da jylý-energetıka orta­lyǵy qazandyqtarynyń materıal­dyq tehnıkalyq bazasyn jaqsartý, baǵany turaqtandyrý, burynyraq­ta oryn alǵan óreskel kemshilik­terge endi jol bermeý kerektigine toqtaldy. Aıtalyq, munda kezinde tútin tartatyn qubyrǵa deıin jekeshelenip ketken. Jıyn barysynda sóz alǵan “Qus joly” kompanııasynyń bas­shysy Lı myrza ortalyq quryly­sy­nyń belgilengen ýaqyt­ta iske qosylatyndyǵyna sen­dirdi. Al jıyndy qorytyndy­laǵan Pre­mer-Mınıstr Kárim Másimov óziniń Elbasynyń tapsyrmasymen kelgenin aıta kelip, ınvestor sózin ustasa, Úkimet tarapynan olarǵa qoldaý bolatyndyǵyna sendirdi. Ol sonymen birge tıisti oryndarǵa óńirde jylý men energııa kózine tó­lemdi múmkindiginshe turaqtan­dyrý jóninde tapsyrma berdi. Munan keıin Úkimet basshysy osyndaǵy Abaıdyń qoryq mura­jaı­ynda bolyp, onyń jumysy­men keńinen tanysty. Al munyń da sebebi joq emes. Iаǵnı, bıylǵy jyly hakim aqynnyń týǵanyna 165 jyl tolsa, al aqyn mura­jaıy­nyń ashylǵanyna – 70 jyl. Soǵan oraı, Premer-Mınıstr qoryq murajaı quramyndaǵy “Alash arystary” fılıalyna alash qaı­ratkeri Ahmet Baıtur­synovtyń ǵıbratty sózderi jazylǵan eskert­kish sývenırdi syıǵa tartty. Tús aýa Premer-Mınıstr men onyń janyna ergen Úkimet múshe­leri Tarbaǵataı aýdanyna ushyp baryp, bıylǵy qystyń qaharyna meılinshe qatty ushyraǵan Kók­jyra aýylynda boldy. Qazirde munda elýden astam úı boı kóterip qaldy. Kárim Qajymqanuly tabıǵat apatynan zardap shekken aýyl turǵyndaryna Úkimet tarapynan qamqorlyq odan ári jalǵasatyndyǵyna sendirdi. Dáýlet SEISENULY.